National Youth Icon Grace-i lawmpui

Ministry of Youth Affairs & Sports-in Viksit Bharat Yuva Connect hnuaia National Youth Icon atana a thlan Grace Lalrinpari Hauzel d/o Lalsangzela Hauzel, Khatla chu Sports & Youth Services department chuan nimin khan SYS minister Lalnghinglova Hmar pisaah lawmpuina an hlan.

Lalnghinglova Hmar chuan, Grace Lalrinpari chu a chhuan thu sawiin, "A thawhrim rah avangin National Youth Icon nihna hi phu taka chang thei a ni a, ka lawmpui tak zet. A bul ṭanna hi Sports & Youth Services department-in a buaipui a nih avangin kan intitatu viau a ni," a ti.

Vikshit Bharat National Youth Icon hi India-in kum 2047-a ram hmasawn (developed nation) nih a tumnaa Viksit Bharat Yuva Connect hnuaia an hmatheh tura palai nihna a ni. Grace Lalrinpari hi January 2025-a Mizoram aiawha Young Leaders Dialogue, New Delhi-a kal zinga mi niin, India ram pum huapa ti ṭha thlan chhuahah a tel.

Grace Lalrinpari Hauzel hi Pachhunga University College-a 5th semester (History) zirlai a ni a; SYS department-in kawng engkima an buaipuinaah a lawm thu sawiin, "Youth Icon nihna hi lawmman a ni lo a, mawhphurhna a ni. Mizoram chauh ni lo, India ram ṭhalaite aiawh leh hmatheh ni tura mawhphurhna a ni," a ti.