KHAWTHLIR

Thisen pe

Mizoram Hindi Training College NSS leh Red Ribbon Club chuan an college golden jubilee pualin nimin khan thisen pek an huaihawt a, Synod Hospital tan thisen unit 14 an pe a, petute mipa pakua leh hmeichhia panga an ni.

Wildlife Week rally

71st National Wildlife Week lawmna kal zelah Kawrthah Forest Division chuan nimin khan Kawrtthahah awareness rally leh hnatlang an huaihawt. Rally-ah hian kumina Wildlife Week thupui 'Human-Animal Coexistence' tih chu a zau thei anga thehdarh a ni a, hnatlangah hian Forest Complex leh khaw chhung hmun hrang hrangte tihfai a ni. Wildlife Week puala a buatsaih inelna hrang hranga lawmman sem a ni bawk.

Gas man bithliah

Indian Oil Corporation-in eirawngbawlna gas man a tihchhuah thar zûlzuiin FCSCA department chuan gas man a bitliah thar a, October 1, 2025 khan hman ṭan a ni. Vairengte tih loh hmun dang zawngah gas domestic cylinder man Rs 1,005, commercial cylinder man Rs 2,043, XtraTej (kg. 19) man Rs 2,065.50 leh composite (kg. 10) man Rs 723.50 a ni a; Vairengteah chuan domestic cylinder Rs 996, commercial cylinder Rs 2,029, XtraTeJ Rs 2,051.50 leh composite Rs 714 a ni.

Operation Jericho

Lawngtlai district bawrhsap Donny Lalruatsanga kaihhruaiin nimin khan ramri kaltlanga Lawngtlai district-a ruihhlo lut tur dan chahna atana beihpui thlakna, Operation Jericho, Lawngtlai an ṭhukhawm. Lawngtlai SP kaihhruaina hnuaiah Police, Excise & Narcotics, Central YLA, MJA leh 3rd IR ten hmalak dan tur leh duty nana ṭul leh pawimawh lo duang se; duty-te mamawh tur duangin, state sorkarah thlen ni se, an ti.

ECCE inzirtir

Rashtriya Poshan Maah 2025 pualin nimin khan Aizawl District Programme Officer, Women & Child Development leh Child Development Project Officer, Aibawk ICDS Project chuan Falkawn Anganwadi Centre-II-ah nu leh pate tan Early Childhood Care and Education (ECCE) inzirtirna an buatsaih a; WCD director Zoramthangi Chhangte-in a hmanpui.