T-shirt leh lukhum 315 ve ve an pe

Aizawl Municipal Corporation chuan Aizawl traffic police-te tana a lei t-shirt 315 leh lukhum (baseball cap) 315 chu nimin khan Aizawl City Traffic Police hotute hnenah an hlan.

T-shirt leh lukhum hlanna hun hi AMC conference hall-ah buatsaih a ni a, Aizawl mayor Lalrinenga Sailo leh deputy mayor R Thanglura ten Traffic SP Ruatsanga Ralte hnenah an hlan a ni.

AMC chu khawpui sorkar a nih angin Aizawl khawpui inrêlbâwlnaah mawhphurhna tam tak a nei tih sawiin, Lalrinenga Sailo chuan, Aizawl khawpui enkawlna leh thuneihna kenkawh chungchangah Aizawl Traffic Police nen thawhhona ṭha tak an neih zel a beisei thu a sawi a, "AMC chu Aizawl khawpui inrêlbawlna ṭha zawk thlen theih nan thawhhona kawngah a inhawng a ni," a ti.

Traffic SP Ruatsanga Ralte chuan, Aizawl traffic police-te chu nalh, fai leh hawihhâwm taka awm tura ṭan lak a nih thu a sawi a, "Mi tam tak tan Mizoram hmêl lanna kan nih avangin ṭan kan la nasa hle," a ti. An hnathawh hahna hriatpuitu leh duhsaktu AMC chungah an lawm thu a sawi bawk.