SSWRC-in chawimawina a dawn lawm a ni

Social Welfare, Women & Child Deve-lopment (SWWCD) minister Lalrinpuii chuan nimin khan Chanmari West-a State Social Welfare and Rehabilitation Centre (SSWRC)-in SKOCH Award a dawn leh kum 35 a tlin lawmna a hmanpui.

Tun hmaa Protective Home tih ṭhin SSWRC hi India rama state sorkarin centre a enkawl awm chhun a ni a, September 20, 2025 khan New Delhi-a Skoch Summit 101 neihah SSWRC hian SKOCH Award for Silver Category in Social Welfare a dawng.

Award an dawn theih chhan chu state sorkar enkawl hetiang centre-te zinga inrelbawlna ṭha nei leh hna thawhṭhatna hmun a nih vang a nih thu sorkar thuchhuahin a tarlang.

Lalrinpuii chuan, SSWRC a lawmpui thu sawiin, ruihhlo vanga Mizoramin harsatna a tawhte siamṭha turin sorkarin hma a lak thu a sawi a, "Mipuite harsatna sukiang turin sorkar chuan theihtawp chhuah zel a tum a, chu’ng zingah chuan SSWRC rawngbawlna pawh a tel a, ṭha taka thuam zel a ni dawn," a ti.

Award lawmna inkhawm hi SWWCD secretary Lalzarmawii'n a kaihruai a, SWWCD hotu te, tlawmngai pawlte leh SSWRC aiawhte an tel.

SSWRC hi kum 1990 aṭanga kalpui niin, Chanmari West (Maumual)-ah a awm a; ruihhlo vanga harsatna tâwk hmeichhia 50 enkawl theihna hmun a ni. Thla sarih chhungin rehabilitation bakah skill training - puantah, puanṭhui, beautician, computer course-te zirtir a ni ṭhin a; enkawl lai mi 50 leh thawktu 24 an awm mek a ni.