Mizorama Covid-19 positive rate 2.29%

Mizoramah January 10, Pathianni thleng khan swab sample 1,87,079 endik a ni tawh a, chu'ng aṭang chuan Covid-19 positive mi 4,293 hmuh chhuah a ni a, chu chu endik zat aṭangin 2.29% a tling.

Covid-19 vei hmuh chhuah tawh mi 4,293 zinga mi 2,036 chu Mizoram chhunga kái chhâwng an ni a; mi 2,257 chu Mizoram páwn aṭanga an rawn luh hnua hmuh chhuah an ni thung.

Covid-19 vei leh vei loh hre tura Mizoram aṭanga swab sample endik hmasak ber chu February thlaah a ni a, state páwnah hian sample 58 endik niin, Covid-19 positive pakhat hmuh chhuah a ni.

A tìrah chuan Kol­kata-a National Institute of Cholera and Enteric Diseases (NICED)-ah endiktir niin, chumi hnuah Guwahati Medical College-ah endiktir leh a ni a, Guwahati-ah hian Mizorama hripui vei hmasa ber hmuh chhuah a ni. Thlawhtheihna tihtawp a nih hnuah Silchar Medical College-ah sample endiktir leh ṭhin a ni bawk. 

April 7, 2020 aṭangin ZMC Covid-19 Laboratory-ah swab sample endik ṭan a ni a, January 10 thleng khan sample 93,160 endik tawh a ni. ZMC-ah hian Covid-19 positive 2,608 hmuh chhuah a ni tawh a, chu chu endik zat aṭangin 2.80% a tling.

TrueNAT-PCR hmangin district hrang hrangah swab sample 17,046 endik tawh niin, hripui vei mi 657 hmuh chhuah a ni tawh a, chu chu endik zat aṭangin 3.85% a ni. RAT hmangin sample 76,833 endik a ni tawh a, Covid-19 positive mi 1,027 hmuh chhuah a ni a, chu chu endik zat aṭangin 1.34% a ni.

Mizorama Covid-19 vei hmuh chhuah tawh zingah civil mi tam berin, mi 3,091 an ni a; Border Security Force zingah mi 575, Assam Rifles zingah 250, National Disaster Response Force (NDRF) mi 32, CRPF mi 33, sipai (army) 46, BRTF mi 80 leh truck enkawltu (driver & handyman) mi 185 hmuh chhuah a ni tawh bawk.

Hetih lai hian, Mizoram luhka hrang hranga Mizorama lut tur enfiah (screen) tawh zat chu 2,13,439 a ni.