VC inthlan result-ah danglam a awm

August 27, 2020-a village council inthlan neihah, Lunglei district-a khaw 16 aṭangin State Election Commission (SEC)-ah complaint a lut a, chu'ngte chu tun hnai khan Lunglei District Election Tribunal-in an enfiah a, khaw pakhatah result a danglam.

Ṭawipui North-II khuaa independent candidate thlan tlin, VC President nihna chelh mektu chu endik lehnaah hian a tling lo a; independent candidate dang, August 27, 2020-a tling loa puan tawh zawk chu a tling zawk tih finfiah a ni. Result chhiarnaah an pahnih hian vote hmuh a inan avangin ṭhum váwrin a tling tur zawn a ni a, mahse, endiknaah hian vote hmu tam zawk an awm ta a ni.

Hetih lai hian, khaw 15 dang aṭanga complaint lutah erawh chuan thil dik lo hmuh a ni lo. Lunglei District Election Tribunal chuan an endikna report chu SEC-ah an thawn tawh.