Airport kan chán hman ṭêp - Chief Minister

General Admi­nistrative department (GAD) changtu chief minister Zoramthanga chuan, Mizoramin Lengpui Airport a chán hman ṭêp niin Vanglaini a hrilh a, "Air Force hnena hlan keini chuan kan phal teuh lo," a ti.

Chief Minister chuan, Lal Thanhawla sorkar laiin Lengpui Airport chu Indian Air Force (IAF) hnena pekna tur dah a ni tawh nia sawiin, "Tunah pawh rawn lâk tumin an rawn kal a, kan phal teuh lo. Silchar Airport pawh Air Force-in kan pian hma indopui laia an lâk tawh a ni a, hma a sâwn lo reng reng. An hmang tawp a, an ngaihsak lo," a ti a; a kaihhruai sorkarin an phal loh avangin Lengpui Airport chu IAF-in lâk an tum tawh lo niin a sawi.

Hmunpui tlanga biakhlatna hmunpui tia sawiah Airport Authority of India (AAI)-in kháwl, cheng nuai tél man Congress sorkar laiin an rawn thlen thu sawiin Zoramthanga chuan, "A awm tuiêk ṭan a, AAI lamin in duh loh chuan kan rawn la kir dawn an ti a. Kan sorkar hman chiah a, keini'n beihpuiin kan bei a, a function ṭan dawn. Bangladesh chhak lama thlawhna kal zawng zawngte guide thei tur khawp kan dah a ni," a ti.

Chief Minister sawi danin, Mizoram sorkarin India hmarchhak biala airport ṭha ber pawl neih tumin theihtawp a chhuah a, Lengpui Airport chei ṭhat hna a thawk mek a ni.