MPF-in Congress Bhavan-a inkhawmah 'Sorkar inrêlbâwlna tha' tih thu an sawi

Mizoram People Forum (MPF) chuan nimin khan Congress Bhavan-ah Congress party mite 'Sorkar inrêlbawlna ṭha' tih thupui an sawipui a; MPF aiawhte bakah, chief minister Lal Thanhawla ten thu an sawi.

MPF general secretary Rev.Dr R Lalbiak-mawia chuan, sorkarin thil ṭha turah chuan huai taka a kal ngam a ṭul thu leh langtlang taka thil a tih a pawimawh thu sawiin, Gram Sabha leh social audit-te hman ṭangkai thiam a ṭul thu a sawi a, "Kan hnathawhah kan rinawm tur a ni a, rin ngam kan ni tur a ni. Contract hnate hi a ṭha tur a ni. Sum siam ringawt hi kan ram tan bakah, keimahni tan ngei pawh a ṭha ber lo," a ti.

MPF aiawhin Information & Communi-cation Technology-a chief infomatic officer Lalthlamuana chuan, sorkarin a tih âwm tak a tih loh leh a tih tur a tih lohah mi dang mawhpuh loa mawh a lâk ngam a ngaih thu a sawi rualin, mipuiah pawh mawhphurhna pek thiam a pawimawh thu a sawi.

Chief minister leh Congress party president Lal Thanhawla chuan, MPF-in ram inrêlbâwlna atana an duhthusamte an party pisaa an sawi chu lawmawm a tih thu a sawi a, "Duhthu sâmah sàm luat a awm lo a, MPF duh angte a hlawhtlin theih nan Pathianin hun ṭha min pe a, Pathian kan lama a ṭan loh chuan engmah kan ti thei lo, Pathian lamah kan ṭang hmasa tur a ni," a ti.

Lal Thanhawla chuan, politics-in mi zawng zawngah nghawng a nei tih sawiin, "Thlarau lam nun thlengin a nghawng a ni," a ti a; an party chuan hmathlir thui tak an nei tih sawiin, "Pathian ropuina turin he ram leh hnam hi kan buatsaih a ṭul a, miretheite'n lei rem an rah a pawimawh... Chanchin ṭha hril hna kan thawh reng phawt chuan Pathianin he ram hi tú chîmral mah a phal lo ang tih hi kan rin dan a ni," tiin a sawi.

MPCC President chuan, MPF-in an sawi ṭhin pakhat, mipui duh dan thlir thiam leh ngaihdan lak (concensus) chu pawl pakhat chhungah lo chuan thil harsa tak nia a hriat thu a sawi a, "A tak taka a hmuna han awm chuan thil hi a harsa ve a ni. Chuti chung chuan, thil ṭhenkhatah chuan opposition-te thu leh hla pawh kan hotute hian an ngaichâng ve ṭhin," a ti.

Lal Thanhawla chuan, inthlan dawnah sum leh pai hman loh an duh tih sawiin, "Ringtu ni si, lei theih nihte hi a ṭha lo. Sum leh paia inlei tlin hi kan hruaitute min hruai tum dan a ni lo," a ti. Indira Gandhi hun laiin Mizoram inthlanna atan an hmunpui lamin an party chu sum tam tak an rawn pe a, mahse, inlei tlin an duh loh avangin cheng nuai 10 chuang an pe let a, Rajiv Gandhi hun laiin cheng tam tak an pe let tawh bawk niin a sawi.

Chief Minister chuan, sum leh pai harsat-nain rorelna dik kalpuina kawngah harsatna a siam vea a ring thu a sawi rualin, Mizoram sum leh pai dinhmunin ziaawm lam a pan mek thu a sawi a, "Sum leh paiah mipuite thlaphâng lo turin a thlamuan ngam tawh a ni," a ti. "Rorelna ṭha, rorelna dik leh fel nei turin ṭan kan la a, mahse, duhthusam hi chu engtikah mah kan thleng thei lo ang," a ti a; MPF-te thu sawite chu an party hotute thinlungah chám reng se a duh thu a sawi bawk.

Finance minister Lalsawta pawhin thu sawiin, sorkar hnathawhte mipuiin an hriat ve a ṭha tih a sawi a; chutih rualin, sorkar hnathawh hrang hrangte sawi lanna hun remchang chu function-a an tel ṭhinte a nih thu sawiin, "Mahse, khualliana kan ṭannate hi hrethiam lo an awm ve leh bawk ṭhin a, lansarh châk leh mahni hna pangngai pêla kal nasaahte an ngai ṭhin," a ti.

Inkhawmah hian minister leh MLA eng emaw zat an tel a; minister PC Lalthanliana pawhin thu a sawi a ni.