Pawisa thleng theih zat tihniam

Sorkar laipui thupek angin, ni khata bank-a sum thleng theih zat chu nimin aṭang khan Rs. 4,500 aṭangin Rs. 2,000-ah tihhniam a ni.

SBI Main Office-a assistant general manager Pradip Kumar Sen chuan, tunah hian SBI-in pawisa nei tam tawk mah se, pawisa nawi, Rs. 100 note leh a hnuai lam a tam loh avangin mipui harsatna sukiang tura chak taka hmalak theih a ni rih lo niin a sawi a; RBI hotute pawh Mizorama pawisa nawi tam zawk thawn turin ngen reng a, pawisa nawi tam zawk an dawn thuai an beisei thu a sawi.

Pradip Kumar Sen chuan, mi ṭhahnem takin bank la dawr mah se, Rs. 500 leh Rs. 1,000 note tihhlum a nih thu puan a nih tirh aiin bank dawrtu an tlem hret hret tih a sawi bawk.

SBI hotute sawi danin, nimin khan Aizawla SBI enkawl ATM 55 zinga 48 chu hman theih a ni a, Aizawl pawn lama ATM 27 zinga 25 pawh hman theiha siamṭhat a ni tawh.

Hetih lai hian, chief minister Lal Thanhawla chuan nimina Congress Bhavan-ah thu a sawinaah, pawisa note tihthih a nih chungchangah Mizorama sumdawngte chungah lawmthu a sawi.

Lal Thanhawla chuan, "Phai lamah chuan an buai em em a, intlarna lama chesual leh thlai hralh theih loh vanga intihhlum vangin mi 40 velin an thih phah tawh. Kan ramah chuan kan sumdawngte'n note hlui an la dawng thei zel hi a ropui a, a lawmawm. Ringtute tih dan tur âwm tak a ni," a ti.