Jordan Centre sak/thawm ṭhat nan Cheng nuai 434 chuang pe tawh

Mizoram sorkarin ruihhlo ngaite enkawlna tura a din Jordan Centre, Seṭhawn sak ṭhatna leh thawm ṭhatna atan August 31, 2020 thleng khan Rs. 4,34,59,891 pek chhuah a ni tawh.

RTI Act hmanga SEDP hnuaia board hmalakna atana sum hman dan leh sorkar aṭanga dawn zat zawhna chhángin Social Welfare & Tribal Affairs SPIO chuan, Jordan Centre sak/thawm ṭhatna atana sum hmuh tawhte chu K-Deposit aṭanga pek chhuah a ni a, ṭum ruk pek chhuah tawh a ni.

SPIO tarlan danin, kum (financial year) 2019-20 chhung atan December 12, 2019-ah Rs. 9,20,71,500 dah (allocate) a ni a; Rs. 3,19,85,99 chu supplier hnenah e-payment hmanga pek niin, Rs. 8,88,73,401 chu K-Deposit ah dah a ni.

Social Rehabilitation Board din nan leh hna thawh nan kum 2019-20 khan Socio Economic Development Policy (SEDP) hnuaiah Rs 19,48,616 hmuh a ni a, hman zawh a ni tawh. Kum 2020-21 atan SEDP hnuaiah Rs. 25,14,000 hmuh leh niin, Rs. 6,84,740 hman a ni tawh bawk.

RTI Act hmanga information dawn chinah, kum hnih chhunga SEDP hnuaia board tana pawisa pek tawh zat chu Rs. 44,62,616 a ni a, chuta ṭang chuan Rs. 26,33,356 hman tawh niin, kum 2020-21 chhunga pek chhuahah Rs. 18,29,260 a la awm a ni.