Lengpuiah St. Xavier's College din dawn

Lengpui khuaah St. Xavier's College din a ni dawn a; nimin khan college dinna tur hmunah Aizawl bishop Most Rev. Stephen Rotluanga'n lungphùm a phúm. St. Xavier's College-ah hian kum 2017 aṭangin class ṭan a ni ang.

Most Rev. Stephen Rotluanga chuan, Mizorama St. Xaviers College din tur chu ṭha tak leh tluang taka din a nih theihna atana Pathian hnena a hlan a, chumi hnuah college din tur lungphùm a phúm a ni.

College tur sak mek enkawltu father Dr Daniel Baka chuan, "Vawiin hi ni lawmawm tak a ni. State danga college ṭha tak tak ang Mizorama a rawn luhna tur a ni," a ti a; college hlâwkpui ber tur chu Mizo mipuite an nih thu a sawi.

Dr Daniel Baka chuan, college din phalna petu Mizoram sorkar lakah te, department hrang hrangin an puih ṭhat vang te, Lengpui khawtlang hruaitu leh mipuite
ṭawiawmna avangin an lawm tak zet thu a sawi.

College enkawltute sawi danin, St. Xaviers College din turah hian June 2017 aṭangin BA first semester aṭangin class ṭan tum a ni a, a tahtawlin class hawn belh zel a ni ang. BA bakah hian, science, commerce leh subject dang pawh hawn zel tum a ni. Building hmunhma duh anga peih hman a nih dawn loh avangin, nakkumah chuan hostel a awm hrih dawn lo a, building peih a nih hunah hostel a awm ang.

St. Xavier's College hi Jesuits of Darjeeling Province hnuaia din tur a ni a, anni hi India rama college lâr leh ṭha St. Xaviers's College (Kolkata leh Mumbai), Chennai-a Loyola College leh Bangalore-a St. Joseph College neitute an ni.

College dinna atan hian Roman Catholic-te'n an ram an pek bakah, ram dang lei belh a ni. Tunah hian college hmun tur cheibâwl mek a ni a, college sak hna enkawltute chuan nakkuma BA first semester ṭan hman tura an inpeih hman ngei tur thu Vanglaini palai an hrilh.