Bill siamthat phûtin Aizawlah kawng zawh

Parliament winter session-a a ngaihtuah tur zinga sawi, HIV Bill chu siamṭhat phûtin nimin khan India ram pumah HIV positive pawl hrang hrangte leh anmahni enkawlna lama thawktu NGO-te'n rally an nei a; Mizoramah pawh zawm vein, Aizawlah rally an huaihawt.

Rally huaihawttu zinga mi, Positive Women Network of Mizoram (PWNM) hruaitute sawi danin, 'HIV Bill' tia an sawi, Section 14-ah chuan, HIV+ve te tana enkawlna chungchang ziah a ni. Section 14-ah chuan, sorkar laipui leh state sorkarte'n HIV hrik pâite damdawi lak ṭhin Anti Retroviral Therapy (ART) leh HIV vanga natna awm thei enkawlna chu 'A theih chin chin' tia ziah a ni a; ART leh HIV vanga natna awm thei enkawlna leh an kai darh tur venna kawngah kaihruaina fel tak siam turin sorkar laipui chu tih a ni.

Cabinet-in Parlia-ment-a pawmpui tura HIV Bill a duan chu ṭha an tih rualin, Section 14-a sorkar laipuiin HIV+ve te 'A theih chin chin' ART leh ṭul dang ngaihtuahsak tur ang chauha dah a ni chu an duhkhawp lo tih PWNM hruaitute chuan an sawi. HIV vei tam zawk chu khawsak harsa tak tak, an inenkawlna tura mamawh - ART, CD4 Test, viral test leh thil dangte senso sorkarin a tumsak loh chuan an tan a harsat dawn avangin, 'A thlawna engkim inenkawl' tura sorkarin dan a siam an ngen tih an sawi a ni.

Dan thar siam turah, HIV veite 'a theih chen chen' a thlawna enkawl tih ni lo a, 'a thlawn veka enkawl' tia dah an duh chungchangah hian Mizorama HIV+ve pawl aiawhte chuan Mizoram MP-te pawh an sawipui tawh tih an sawi a; Mizoram MP-te'n theihtawp an lo chhuahpui tur thu an hrilh avangin lawmawm an tih thu an sawi bawk.