Lunglei MZP-te'n kawng an dang leh

Lunglei Civil Hospital (LCH) aṭanga doctor pathum sawn chhuah aiawhtu tur doctor dang dah phûta Lunglei MZP-in Ningani zing aṭanga Pukpuia Aizawl-Lunglei kawng an dan chu nimin khan an chhunzawm leh a; Hrangchalkawnah NH-54 kawngpui an dang bawk. Mizoram sorkar chuan Aizawl Civil Hospital-a doctor pakhat chu LCH-a awm turin nimin khan transfer order a tichhuak.

Kawng dangtu Lunglei MZP hruaitute chu nimin chawhnu khan Lunglei DC Lalzarmawii'n a pisaah kâwmin, kawng dan titawp turin a ngen a; Aizawl Civil Hospital-a doctor pakhat chu Lungleiah dah a ni dawn tih a hrilh a ni.

Lunglei MZP hruaitute chuan kawng dan tihtawp chungchangah thutlukna an siam nghal lo a, an hruaitu dangte nen an inbiakrâwn phawt hnuah thutlukna an siam tur thu Lunglei DC an hrilh. Lunglei MZP-te hi nimin tlai khan an inhmukhawm nghal a; an thutlukna hriat hman a ni lo.

Hetih lai hian, Health department chuan nimin khan order tichhuakin, Aizawl Civil Hospital (ACH)-a AYUSH department-a medical officer Dr Shirley Lalbiakzuali (Ayurveda) chu Lunglei Civil Hospital (LCH)-a awm turin a hriattir.

LCH-a AYUSH department-a medical officer Dr B Lalhriatpuia (Homoeopathy) chu West Bunghmun damdawi-inah sawn a ni a; hei hi Lunglei MZP-te'n tunlaia Lunglei-Aizawl kawngpui an dan chhan zinga pakhat a ni.