KHAWTHLIR
Career guidance
Serchhip Bethel Branch KṬP-a Mesaka Group leh Mizoram Youth Commission ṭangkawp chuan, nimin khan Serchhip P&E Veng YMA Hall-ah Serchhip khaw chhunga high school zirlai naupangte tan career guidance programme an buatsaih a; zirlaite hma lam hun atana thil pawimawh hrang hrang an zirtir a ni.
Discover India
Art & Culture department leh North East Zone Cultural Centre (NEZCC), Dimapur ṭangkawp chuan, nimin khanKolasib-ah Discover North East Discover NE India (Cultural Meet) an buatsaih. He hunah hian Mizoram, Assam, Meghalaya, Manipur, Nagaland, Tripura, Arunachal Pradesh leh Kerala mite'n an hnam lâm ṭheuh an entir a ni.
Ran 1,185 enkawl
Animal Husbandry & Veterinary Hospital, Aizawl chuan October 2016 chhung khan OPD-ah ran chi hrang hrang 1,185 an enkawl a, mobile clinic-ah ran 70 enkawlin, operation theatre-ah ran 217 an zai. October thla chhung vêk khan sorkar sum báwmah Rs. 11,240 an chhung lût a ni.
COTPA bawhzui
Aizawl District Anti Tobacco Squad leh Traffic police-te ṭangkawp chuan, nimin chhûn khan Zarkawt leh Electric Veng inkar kawngpui pheiah mihring phur chi lirtheite'n COTPA an bawhchhiat leh bawhchhiat loh an endik a, dan bawhchhia taxi driver pakua an man.
Bru enfiah
Naisingpara refugee camp-a Bru awmte Mizoram mi dik tak an nih leh nih loh enfiah hna, November 15, 2016-a ṭan chu nimin khan chhunzawm an ni a, chhungkaw 447 endik an ni. Endikte zinga chhungkaw 395 chu Mamit district-a mite an ni a; chhungkaw 50 chu Kolasib district mi niin, chhungkaw pahnih chu Lunglei district-a mite an ni.
Innei
Vanglaini columnist R. Lalzarmawia, Sialsuk leh Lalchhandami te chu nimin khan Sialsuk Presbyterian Biak Inah an innei.