Sorkar pisa hi mipui tana siam a ni - Lal Thanzara

Mizoram Departmental officers' Association (MDTOA) chuan, nimin khan Tourist Lodge-ah General Body Meeting an nei a; khuallian, minister Lal Thanzara chuan, sorkar, sorkar pisa leh sorkar hnate chu mipui tana siam a nih thu a sawi.

Lal Thanzara chuan, sorkar hnathawkte'n hma an sawn mek thu leh mipui tana dawr an awlsam ṭan tawh thu sawiin, "Hmasawnna tur erawh a la awm. Sorkarna, sorkar pisa leh sorkar hnate chu mipui tana siam a ni a, a neitu pawh mipui an ni," a ti a; ṭul loa file tihkhawtlai chíng leh zawhna hrang hrang siam chíngte chu inenfiah turin a chah.

Sakhaw pakhat leh ṭawng pakhat hmang deuh vek chenna Mizoramin India ram dang aia hmasawn zawk ni turin theihna a nei nasaa a hriat thu sawiin Lal Thanzara chuan, "Mipui aiawha sorkar hna chelhtute zawng zawng hian neitu thinlung púin hna thawk se ka duh," a ti.

Minister Thanzara chuan, "Mipui thlan tlin roreltute hian mipui tan ṭha zawka ro an rêlsak theih nan leh mipui hamṭhatna tura ṭha zawka dan an siam theih nan sorkar hnathawkte hian thurâwn min pek inthlahrung lo turin ka ngen che u," a ti a; thuràwn inpek chu mipui tana an thawhhona hlâwk tak a nih ngei a rin thu a sawi.

MTDOA General Body Meeting-ah hian chawhnu lamah ro an rêl bakah, hruaitu thar an thlang a ni.