Mi kut tuara thi chhungte hnenah chhawm-­ ­dawl­na pe

Mi kut tawrh vanga March 18, 2016 zana thi, Ricky Lalhmingsanga, Thenzawl chhungte hnenah Mizoram Victims of Crime Compensation Scheme 2011 aṭangin nimin khan chhawmdawlna Rs. 1,67,500 pek a ni.

Chhawmdawlna hlanna inkhawm hi nimin khan Lunglei District and Session Judge pisaah neih a ni a; District and Session judge R Thanga'n Ricky Lalhmingsanga pa Lalzuimawia hnenah a hlân.

Ricky Lalhmingsanga hi March 7, 2016 zanah Lunglei Electric Vengah miin kut an thlak a, a hliam tuar loin March 18-ah a thi a ni. Ricky-a chhungte chuan Lunglei District Legal services Authority kaltlangin zangnadawmna an dil a, Mizoram Victims of Crime Compensation Scheme 2011 hnuaiah Rs. 1,67,500 pek an ni ta a ni.

R Thanga chuan, India chu welfare state a nih angin sorkarah mipui tan hamṭhatna tak tak a awm thu sawiin, Mizoram Victims of Crime Compensation Scheme hnuaiah pawi khawihna tuartu chhungte'n chhawmdawlna an dil theih thu a sawi a; chutih rualin, pawi khawihna thleng zawng zawngah dil theih a nih loh thu a sawi.

Lunglei Additional District and Session judge Helen Laldawngliani pawhin, state sorkar leh sorkar laipuiin Victims of Crime Compensation Scheme hnuaiah pawi khawihna thleng vanga hliam leh thite bakah, bungraw tihchhiatsak chhungte hnenah chhawmdawlna a siam tur a ni, tih a nih angin pawi khawihna tuartu chhungte'n District Legal services Authority kaltlangin dilna an thlen thei tih a sawi. Dilna chu BPL chhungkaw tana ruahman a nih thu te, pawi khawihna thlen aṭanga thla ruk chhunga thehlut tura tih ni mah se, thla ruk dang hriatthiamnain pawm a nih thute a sawi bawk.