Ruihhlo laka naupang filhlîm dan tur sawiho

State Legal Services Authority (SLSA) leh Centre for Peace and Development (CPD) chuan Ningani khan Aijal Club-ah ruih theih thil laka naupangte fihlîm theihna tura hmalakna atan, 'Seminar on Protecting Children From Drugs' an buatsaih a; Gauhati High Court judge Justice Manash Ranjan Pathak-a'n a hmanpui.

Justice MR Pathak chuan, naupangte chu nakin lawka ram leh hnam innghahna la ni mai tur an nih avangin an pawimawh a, mi ṭha ni tura zirtir an nih chuan ramin hmabak êng tak a nei dawn tih a sawi a, "Damdawi leh ruih theih thila sumdawnna hi khawvelin tihrêm tum mah se, sum maktaduai tam tak leh mihring sang tél an inrawlh avangin nuaibo mai a harsa a, chuvangin ruihhlo lakah ṭhalaite fihlim tura inzirtir hi thil pawimawh tâwpkhâwk a ni," a ti.

Rilru leh taksa khawih khawlotu damdawi hman sualin nunna tam tak a suat tawh a, a suat mek zel bawk tih sawiin MR Pathak chuan, seminar hlawk taka hmang a, ruihhlo ṭhat lohzia mi dangte zirtirtu nih tum turin kalkhawmte a chah.

Seminar-ah hian Mizoram State Tobacco Control So-cie-ty, Central YMA, Social Wel-fare department, Health Department, NDPS Pro-secution Branch leh Aizawl West College aṭanga sawm bikte'n thupui hrang hrang hmangin thu an sawi.

Seminar-ah hian Republic High School, Helen Lowry School, Vaivakawn High School, Khawpuia Memorial Higher Secondary School, St.Joseph Higher Secondary School leh Mizo High School zirlaite an tel a ni.