PM hoin Covid-19 vaccine sawiho

Prime minister Narendra Modi chuan nimin khan state tin chief minister-te leh union territory-a lieutenant governor-te Covid-19 laka invenna damdawi (vaccine) chungchang video conference hmangin a sawipui a, Mizoram chief minister Zoramthanga pawh a tel.

Prime Minister chuan, India ramah Covid-19 vei zat a tlahniam zel a, vaccine lâk theih thuai tura ruahmanna siam a nih thu sawiin, "Chutih karah chuan mipuiin fimkhurna thlah loin he hri laka him thei tura zawm tur pawimawhte zawm zel a pawimawh," a ti. 

Union Health Secretary-in a tarlan danin, healthcare worker mi nuai 100 vela chhûtte hnenah vaccine pek hmasak a ni dawn a; frontline worker mi nuai 200 vel leh kum 50 aia upa leh kum 50 hnuai lam natna benvawn nei, mi nuai 2,700 velte hnenah pek chhunzawm a ni ang.

Healthcare worker leh frontline worker-te'n vaccine an lâk man chu sorkar laipuiin a tumsak tura ruahman a ni a; state leh UT-te chu January 16, 2021 hmain vaccine la tura ruahmanna siam ngai zawng zawng peih vek tura beisei an ni.

Covid-19 vaccine hi 'dose' hniha lâk tur a ni a, dose pakhatna leh pahnihna inkarah ni 28 a tla ang. Dose vawi hnihna lâk aṭanga ni 14-na aṭangin vaccine-in a thawh tur ang takin a thawk ṭan dawn a ni.

Sorkar thuchhuah tarlan danin, Mizoramah chuan Covid-19 vaccine la hmasa tur healthcare worker mi 14,000 chuang database-ah thun an ni tawh a, frontline worker-te data khawn mek a ni.