Child Welfare Committee-in Thubuai 5,622 an ching fel tawh

Aizawl District Child Protection Unit (DCPU) leh Child Welfare Committee (CWC) hotute chuan, kum 2012 aṭanga kumin October thla thleng khan CWC-in Mizoram pumah case 5,622 an chinfel tawh thu an sawi a; naupang case an dawn zinga tam tak chu Mizoram ṭhenawm ram leh state aṭanga rawn pém lutte an nih thu an sawi.

Aizawl DCPU leh CWC hotute hian World Day for the Prevention of Child Abuse, November 19 pualin Inrinni khan Aizawl Press Club-ah thuthar thehdarhtute an kâwm a; Aizawl CWC chairman Prof. Lalkima'n kaihruaiin, naupang venhim a
ṭul leh naupang chunga hleilenna leh dan bawhchhiatna chungchangte an sawi.

Aizawl DCPO James Lalthangmawia sawi danin, kum 2012 aṭanga October 2016 thleng khan Mizoram pumah CWC-in case 5,622 an chingfel. Case zinga 451 chu pawngsual leh inkhuaikhemna lam a ni a, 271 chu taksa chunga hleilenna (physical abuse) niin, case 91 chu rilru hliam tuar (emotional abuse) an ni.

Naupang ngaihthah 474, nu leh pa fate enkawl tlak lo case 662, ruih theih thila buai naupang puih ngai 54, fahrah 146, sorkar hnena fa pek 189, fa kalsan (abandoned) 108, child labour 29 leh naupang rûkbo case 24 a awm bawk.

Juvenile Justice Board-ah kum 2012-2016 chhungin naupang dan bawhchhia case 1,214 an awm a; chung zingah chuan zu khapna dan bawhchhia 94, damdawi/ruihhlo khawih 45, rûkrûk, in rawk leh mi suam belhkhawm case 659 a awm. Rûkrûk leh insuam case-a inhnamhnawihte chu ruihhlo tih vanga thleng a nih tlangpui thu, James Lalthangmawia chuan a sawi.

Zawhna chhangin Aizawl DCPO chuan, mipat hmeichhiatna rawng kaia naupang chunga hleilenna leh naupang khuaikhemah Mizoram chu India ramah a sàn lawr lak thu a sawi a, "CWC leh JJB case hrim hrim-ah Mizoram hi kan sang bik lo a, mipat hmei-chhiatna kaihhnawih leh naupang khuai-khemah Mizoram kan sang ber. State dangah chuan child labour a sang thung," a ti.

Aizawl CWC member Dr C Lalsangzuala chuan zawhna chhangin, naupang zinga dan bawhchhiate chu chhungkaw dinhmun ṭha lo, chhungkaw kehchhia leh enkawltu ṭha nei lo an nih tlangpui tih a sawi a, "Naupangte zingah ruihhlo khawih an tam sâwt hle," a ti a; JJB leh CWC case-a naupangte chu tuna an awm angin ṭhang lian ta se, Mizoram ram tana pawi tham a nih thu a sawi.

Dr C Lalsangzuala chuan, CWC chu naupang hremtu tur an ni lo tih sawiin, "Fine tênau tê tê chu kan pe thei ve. Kan tih tur pawi-mawh zawk chu naupang, a tuartute
ṭanpui leh chhawmdawl dan tur ngaihtuah a ni," a ti.

CWC member Vanramchhuangi chuan, naupangte ruihhlo zawrh luihtir thubuaite pawh an nei tawh thu a sawi a, "Naupang case kan neih zinga tam tak chu ṭhenawm ram/state aṭanga rawn pém lutte an ni," a ti.

Home-ah naupang duh duha dah luh phal a ni tawh lo a, dah an duh chuan CWC kaltlang veka tih a ngaih tawh thu an sawi bawk.

Naupang ṭanpuina turin Childline no. 1098 a awm a, naupang chunga hleilenna leh khuaikhem leh thil ṭha lo dang hriate tan eng lai pawhin biak/thlen theih a ni