AMC-in khawpui dang tih dan ṭhate Aizawla tih ve dan tur zawn an tum
Aizawl Municipal Corporation (AMC) councillor-te chuan, tun hnaia India rama khawpui hrang hrang inrêlbâwl dan zir chianga an kalnaa an thil hmuh, Aizawl khawpui tana tih ve atana ṭha an tihte chu bawhzui an tum thu an sawi.
AMC councillor 12-te leh official pathumte chuan November 1-12, 2016 chhung khan Delhi, Shimla, Chandigarh, Deh-radun, Musoorie leh Jaipur-te an tlawh a; khawpui sorkar inrelbawl dan leh inenkawl dante an zir.
Tour-a AMC counci-llor kalte chu - deputy mayor Lalringliana, Zonunsangi Fanai, B Lalawmpuii, K Lalhmingliani, Ro-siam-ngheta, Laltlanzo-va Khiangte, Lalhming-mawia, R Thanglura, H Zonunsanga, C Lalthan-sanga, K Romawia leh H Vanlalruata te an ni.
AMC study tour-a kalte hian Inrinni khan Aizawl Press Club-ah thuthar thehdarhtute kâwmin, an zinnaa an thil hmuhte an sawi.
Deputy mayor Lalringliana chuan, mi 2,30,000 vel chenna Shimla khawpuiah kea kalte tan bik kawngpui km. 2.5-a thui a awm thu te, property tax aṭangin kum khatah cheng vbc. 15-16 vel an hmuh ṭhin thu te, khawpui chhungah motor lian reng reng luh an phal loh thu te, Pathianni tih loh ni tin bawlhhlawh an paih thu te, bawlhhlawh aṭangin kawlphetha megawatt 2 an siam chhuah thute a sawi.
Lalringliana chuan, Chandigarh khawpui chu 40% vel thingin a khuh a, bawlhhlawh sawngbawl leh enkawl chu mimal kutah an hlan a, khawl hmanga an tihfai ṭhin thu leh kawtthler tinah CCTV an vuah thu te; Dehradun/Mussoorie khawpui chu Aizawl ang bawka tlang sang, awih leh chhengchhia ni mah se, a ngheh ṭhat thu leh an enkawl uluk thute a sawi bawk.
Aizawl Dy. Mayor chuan, khawpui sorkar hlun tawhte aṭangin zir tur a tam hlea an hriat thu sawiin, an zinna aṭangin thil tam tak an zir chhuah thu a sawi a, "Study tour hi AMC rorelna leh Aizawl enkawlnaah kan la chhawr ṭangkai ngei kan beisei," a ti.
AMC councillor-te chuan zawhna chhangin, khawpui an fannaa an tih dan ṭhate chu Aizawl khawpui tan tih ve dan tur an ngaihtuah dawn thu an sawiin, meeting an neih thuai dawn thu an sawi.