Chin Chief Minister-in Saisihchhuaha Border trade leh lei dawhna tur a tlawh

Myanmar rama Chin state chief minister Lianluaia chuan, November 17, 2016 tlai khan Saisihchhuah, Lawngtlai district-a border trade hmun tur leh Ṭiau lui chunga lei dawhna hmun tur a tlawh a; Mizoram sorkar aiawhin minister C Ngunlianchunga leh parliamentary secretary pahnih Joseph Lalhimpuia leh H Zothangliana ten an lo dawngsawng.

Chin CM Lianluaia chuan, Zo hnathlakte tan Pathian a
ṭhat thu sawiin, "Kan tan ro min rêlsak zel dawn a, ram pahnih Zo hnahthlakte insumdawn tawn theihna tur kawng min hawnsak dawn. Myanmar ram pawh democracy a nih tawh avangin Mizote tan inpawhna ṭha zawk kan nei thei tawh dawn a ni," a ti.

Border trade hawn a nih hun-ah chuan châkkhai awlsam zawka inlam tawn theih a ni dawn tih sawiin Lianluaia chuan, "Zo hnahthlakteah rah ṭha a chhuah ngei thei dawn a ni," a ti a; border trade neih thuai a nih theihna atan Chin state leh Mizoram state-ten an sokar laipuiah ve veah chak zawka hmalak a nih theih nana ngen tawh a pawimawh thu a sawi.

Joseph Lalhimpuia chuan, "Vawiin hi Zo hnahthlakte tan ni chhinchhiah bik, kan Mizo history-a méllung pawimawh leh theihnghilh tawh ngai loh tur a ni. Ram pahnih kan inchhawr tawnna tura rahbi pawimawh tak, Myanmar chauh ni lo, Asia khawchhak ram hrang hrang nen pawh Myanmar kaltlangin kan indawr tawn thei tawh dawn a ni," a ti.

Chin Chief Minister hi an minister leh Chief Secretary-te'n an ṭawiawm a ni.