MPC-in mobile campaign an chhunzawm

MPC party chuan Inrinni khan Aizawl khaw-puiah, 'Zoram tluchhe mek tun din lehna' tih thupuia hmangin mobile campaign an buatsaih leh a, hmun hrang hrangah thu an sawi.

MPC thuchhuah chuan, Aizawl veng hrang hranga mobile campaign an buatsaih chu hlawkthlak an ti a, MPC party mi leh sa, ngui leh chaua awm tawhte kaih harhin an awm mek zel niin a tarlang a, "Congress leh MNF party-a beidawng leh kal ngaihna hre lo mi tam takin MPC-ah beiseina thar an nei leh mek a ni," an ti.

MPC party chuan, Congress leh MNF party ten kum 30 chuang Mizoram an kaihhruai chhunga ram an khawih chhiatte siamṭhaa tung ding leh turin Mizorama tlawmngawi pawl hrang hrang te, ram veitu, ram tana mi ṭhahnemngai tak takte nen intêlkhawmin, kum 2018 inthlanpui an hmachhawn turah sorkar thar, mipui sorkar siam ngei tuma hma an lak mek thu a sawi a; chuta tan chuan mipui ṭawiawmna an ngen a ni.

MPC chuan, mobile campaign an neihnaa vengtu police leh mipuite ṭawiawmnaah lawmthu an sawi bawk.