Zangnadawmna dik lo taka lak tum I hnawl ngam ang u - Zodintluanga

Minister Zodintluanga chuan, In-rinni zing khan Buarpui khuaa vantlang inkhawmah thu sawiin, Buarpui tlangdunga kawng laih turah zangnadawmna dik lo taka lak tumte hnâwl ngam turin a chah a, "Zangnadawmna dik lo taka lak tum i hnâwl ngam ang u," a ti.

Zodintluanga chuan, Mizoram sorkar hmalaknaa Buarpui tlangdung aṭanga Lunglei panna kawng siam a ni dawn ta chu lawmawm a tih thu sawiin, "Tunah hian NABARD aṭangin cheng vbc. 30 chuang sanction a ni ta hi a lawmawm hle. Lunglei tlangdung panna a nuam tawh dawn a ni," a ti a; tuna kawng siam tur chu kum 2004-05 aṭanga PWD hotute nena an buaipui tawh thu a sawi.

Asian Development Bank (ADB)
aṭanga sum hmuh hanga Buarpui tlang-dunga kawng laih mekah leh World Bank kawngin a tlawh tur hmun ṭhen-khat, ram palailênga ram inpek a awm tih a hriat thu sawiin, Zodintluanga chuan, "Mahni huan kumhlun neite chuan dik takin zangnadawmna la rawh se, mahse, chu ti ni lo a, he hmalakna vanga ramhnuaia ram inpea dik lo taka zangnadawmna lak tumte hi NGO ang pawhin inhlawm khawm ula, hnâwl ngam rawh u," a ti.

Minister chuan, dik lo taka ram pass insiamsak hi a awm mek thu sawiin, "Hetiang thil dik lo hnâwl tur hian i ṭang ngam ang u. Kawng hi a nihna tur a nih loh phah ang tih ka hlau. Tuirial HEP pawh zangnadawmna vanga hluihlâwn vek a nih kha. Ṭangho ila, mipui hian kan tihlawhchham ve thei a ni," a ti a; ukil ṭhenkhat pawh zangnadawmna buaipuia an la kal mai theih thu sawiin, thil dik lo tih tum an awm chuan lo dang turin tlawmngai pawlte a chah.