Kum thum chhungin Mizoram University-in Cheng vbc. 210 a hmu; building 12 sak a ni
Mizoram University (MZU) chuan April 2012 aṭanga March 2017 thleng khan sorkar laipuia 12th. Plan aṭangin hmasawnna hna thawhna tur sum vbc. 210 an dawng a, hemi chhung vêk hian cheng vbc. 193.90 hmangin in 16 an sa tawh.
Vanglaini palai chuan tun hnai khan MZU campus-a hmasawnna hna thawh kal mek leh sum leh pai an dawn dan leh sum hman dante enin MZU a tlawh. MZU hotute sawi danin, MZU-in 12th. Plan chhunga sum a dawn cheng vbc. 210 hi India rama university zingah a dawng tam pawl a ni a, a dawn tur aṭangin 90% vel a dawng tawh a ni.
Hmasawnna hna thawh ṭhenkhat aṭanga sum hman bâng chu ṭangkai taka hmangin, in sak nan leh kawng siam nan an hmang
ṭhin tih sawiin, MZU registrar Zothankhuma chuan, "MZU hna thawh danah Central an lungawi niin kan hria a, pawisa pek tam tlakah min ngai a, India rama university 40 zingah zirtirtu bikah phei chuan hna ruak hnawhkhat ṭha ber kan ni a, kan inchhuang ve hle," a ti a; 12th. Plan chhungin department pasarih an hawn thar bakah, hawn tuma buaipui mek panga an nei tih a sawi.
MZU Registrar sawi danin, 12th. Plan aṭanga sum an dawn cheng vbc. 210 aṭangin vbc. 193.09 an hmang tawh a, chumi hmang chuan in 16 an sa tawh a, sak mek eng emaw zat a awm bawk. 12th. Plan chhung hian department pasarih - Electrical Engineering, Civil Engineering, Architechture, Sociology, B.Ed, IMBA te an din tawh a; B.Voc. course-ah Web Designing & Medical Technology leh Software Development-te an din tawh bawk.
Zothankhuma chuan, Central aṭanga hmasawnna hna thawhna sum an dawn chu an hman ṭhat avangin sum pek tlai a awm ngai lo tih sawiin, Central-a utilisation certificate an thehluhah harsatna awm loin tluang takin an kal a, sawiselna an dawng ngai lo niin a sawi.
Building thar 16 sak zinga mi, auditorium chu cheng nuai 1170 senga sak niin, May 12, 2015-ah hawn a ni a; mi 800 ṭhut theihna awmin, man chawia hman theih a ni. MZU campus-ah helicopter ṭumna tur helipad siam a ni a, Central aṭanga lo kal mi pathumin an hmang tawh.
MZU Registrar chuan, India ram univer-sity zingah MZU chu zirtirtu hna ruak hnawh-khat ṭha ber an nih thu sawiin, "Univer-sity ṭhenkhatah chuan 30% te, 40% te hnawhkhah lohin a awm a, MZU-ah chuan 16% kan hnawhkhat lo a, 84% kan fill-up thei a, India rama kan inchhuan ve theihna ber pakhat a ni," a ti.
Zothankhuma chuan, 12th. Plan sum hmanga hna thawh zingah cheng nuai 834 sênga siam lei hnuaia tuizêm (under ground water tank) chu an hman ṭangkai thu te, tui dah khawlna hmun pathumah an siam tawh a, Mizoram sorkarin tui a la pek theih loh avangin ruahtui dah khawlna atan an hmang mek thute a sawi a, "Ni khatah tui litre 1,20,000 vel kan hmang ṭhin a, under ground water tank lian berah litre 1,00,00,000 vel a leng a, hmun pakhatah litre 24,00,000 leh hmun dangah 20,00,000, a vaiin tui litre 1,44,00,000 vel dawng thei tur a ni," a ti.
NEC aṭangin Scholar Hostel tur mipa leh hmeichhia mi 50 ve ve (mi 100 tan) awm theihna tur sakna tur an hmu tawh a, UGC aṭangin Management Hostel, mi 200 lenna tur pawh an hmu tawh tih sawiin, thankhuma chuan, tender chhuah theih tura hmalak mek a ni tih a sawi.
NAAC-in university leh college ṭha a tehnaah MZU hian Grade A a hmu mek a, National Institutional Ranking Framework (NIRF)-in India rama zirna in hrang hrang 3,500-te tehna hrang hrang hmanga a teh zingah MZU hi 51-na a ni bawk.
MZU-ah hian solar energy eng emaw zat bun a ni tawh a, thla tin electric bill atan cheng nuai 6-7 vel an chawi ṭhin a; solar energy an hman hnuah cheng nuai 3 velin an bill a tlakhniam phah a ni.
NE state-a university-te dinhmun
(Rupees in crore)
# University Sum dawn NAAC Grade
1. Sikim University 325 B
2. Mizoram University 210 A
3. Tezpur University (Assam) 165 A
4. Tripura University 133 B
5. NEHU (Meghalaya) 132.50 Process
6. Manipur University 130 Process
7. Assam University 127 B
8. Nagaland University 103 B
9. Rajiv Gandhi University(Arunachal) 93.78 B
12th. Plan chhunga MZU-a hnathawhte
(Rupees in lakh)
# Hnathawh Sum sen
1. Auditorium 1170
2. Management 950
3. School of Life Science 1058
4. School of Humanities & Education 835
5. Education 1,853
6. KV Building & Quarters 878
7. Hostel pali 1,783
8. School of Engineering&Technology 1647
9. Civil Engineering 1978
10. Teachers Quarters 1409
11. KV Extension 202
12. Under ground water tank 834
13. Cluster of class room 3188
14. Health Centre 264
15. Examination building 575
16. PUC Boys Hostel 685
Total 19309
12th. Plan-a university-te sum dawn
(Rupees in crore)
# University Dawn zat
1. Central University of Kashmir 350
2. Banaras Hindu University 329
3. Jawaharlal Nehru University 242
4. Jama Milia Islamia, Delhi 235
5. University of Hyderabad 223
6. Aligard Muslim University 217
7. Mizoram University 210
8. University of Delhi 208
9. Central University of Gujarat 155
10. University of Allahabad 147