Lunglei MZP-in total bandh an thulh

Lunglei MZP chuan Lunglei Civil Hospital-a doctor pathum sawn chhuahte aiawh dah phûta vawiina Lung-lei khawpuia total bandh buatsaih an tum chu an ṭhulh.

Lunglei MZP hian Lunglei Civil Hospital-a doctor pathum sawn chhuahte aiawhtu tur dah phûta November 17, 2016 aṭanga Aizawl-Lunglei kawng an dan chu No-vem-ber 19 tlai dar 4 velah an titawp lailâwk a; Pathianni tlai khan MZP hruaitute leh Lungleia college stu-dent union hruaitute ṭhu-
khawm chuan vawiina total bandh neih an rêl a ni.

Hma an lak hnuah Aizawl Civil Hospital-a thawk doctor pakhat (AYUSH) chu Lungleia sawn a ni tawh tih sawiin, MZP chuan, "Doctor pathum aiawh dah tur hian mipuite'n kan tawrhna a nasa tawh a, MZP chuan doctor pakhat ringawt chu lungawina chi-ah a ngai lo," an ti.

Bandh nei tur ruahmanna an siam fel hnuah Mizoram sorkar chuan Lungleiah doctor pakhat dang a dah belh leh a, doctor dah belh leh an nih avang hian nimin tlaia Lunglei MZP hruaitute
ṭhukhawm chuan total bandh neih tur hi ṭhulh an rel a ni.

Bandh an ṭhulh hnu hian Lunglei MZP chuan, "Ziak ngeia thu lawmawm kan dawn tak avangin total bandh hi thulh a ni dawn ta a ni. MZP in lungawilohna a lan tirna kawngah mipuite tan harsatna tam tak kan thlen tih kan hriaa, chuti chung pawha Lunglei leh chhim lam mipuite tana ṭha zawk tur a ni tih hriaa dawhthei taka kan hmalakna min thlawp zel avangin Lunglei mipuite chungah lawmthu kan sawi a ni," an ti.

Lugleia doctor pathum sawn chhuahte thlak turin Aizawl Civil Hospital-a thawklai Dr. Shirley Lalbiakzuali dah a nih hnuah, Dr. Johny Lalmuanpuia dah leh a nih bakah, tuna Delhi awm mek Dr. Lalramsang-a Khiangte chu a report rual ruala Lungleia thawk tura lak nghal a ni.

Total bandh thulh a nih hma hian sorkar chuan thuchhuah siamin, Lungleia doctor pathum sawn chungchangah, November 18-ah sorkar leh MZP aiawhte an indawr thu an tarlang a, "MZP-te hian an dinhmun sawh sawnin, doctor pathum aiah pahnih tal dah ni se a, an ti a ni," an ti.

Sorkar thuchhuah tarlan danin, Lunglei Civil Hospital-a awm tur hian sorkarin November 18, 2016-ah Dr Shirley Lalbiakzuali Chhangte awm turin transfer order/notification a chhuah tawh a; doctor dang pakhat (Diploma in Child Health), tuna Delhi-a awm mekin Lungleia awm inhuamin dilna pawh a thehlut tawh a, December thla chawlhkar hmasa berah a hna a zawm dawn a ni.

Lungleia doctor pahnih dah a ni dawn chunga Lunglei MZP-te'n total bandh an huaihawt tur chu sorkar hmalakna hrethiam duh loah sorkar chuan a puh a, "Mipui tana harsatna siam zawng leh dan loa total bandh huaihawt tum hi sorkar chuan pawi a ti hle a ni," a ti.

Sorkarin doctor sawn chhan a sawifiah

θ Dr S Thaizi chu promotion a hmuh avangin June 1, 2016-ah Lawngtlai District Hospital-ah sawn a ni.

θ Dr Lalremruata (Chest medicine) chu Aizawl District TB Centre (DTC), Falkawnah September 26, 2016-ah sawn a ni a, Aizawl District TB Centre hi district dang aṭang pawha damlo enkawl an ngah avangin fulltime District TB Officer (DTO) ni turin sawn a ni. A thiamna hmangin State Referral Hospital-a Multidrug-Resistant TB (MDR-TB) Ward a enkawl pah thei dawn a ni.

θ Dr B Lalhriatpuia (AYUSH) chu Bunghmun PHC-a AYUSH doctor an awm loh avangin September 30, 2016-ah Lunglei district-a Bunghmunah sawn a ni.