Ruihtheihthil vanga police thi Awm tawh lo se ka duh - HM

Mizoram Police Sports Meet 2016 chu nimin khan Rajiv Gandhi Stadium-ah ṭan a ni. Meet hawngtu, Home minister R Lalzir-liana chuan, zu leh ruih theih thil dang vanga thi police zingah awm tawh lo se a duh thu a sawi.

Home Minister chuan, police-te chu civil mi aiin an taksa a hrisel zawk tur a ni a, an fit reng tur a nih thu sawiin, "Taksa insâwizawi dan leh ei leh inah zirtirna dawng an nih avangin civil mite aia dam rei tura beisei an ni. Zu leh ruih theih thil vanga police mi leh sa thi awm tawh lo se ka duh a ni," a ti.

Mizoram police-te dan leh thupek kenkawh kawngah an pawimawh em avangin sorkarin a duhsak tih sawiin R Lalzirliana chuan, "Duty laia police thite enkawl danah sorkarin a theihtawp a chhuah a, an kalsan tâk an nupui leh fate hnenah an service hun chhung zawnga an dawn tur hlawh pek an nih bakah, an pension kum a thlenin family pension pawh dan pangngai ang thlapa pek an ni," a ti a; police thi chhungte tan LDC hnuai lam hna dahsak reng a nih thu a sawi.

Police Sports Meet-ah hian athletics, football, volleyball, tennis, table tennis, badminton, taekwondo, judo, wrestling, inhruipawh, boxing, chinese checker, carrom leh chess-te hmangin an inel dawn a ni.