SSA-a thawkte hlawh pe turin sorkar phût

MPC party office bearer-te chu an senior vice president Vanlalhlana hoin nimin khan an party pisaah an ṭhukhawm a; thuchhuah siamin, Mizoram SSA hnuaia sikul 499-a zirtirtu 2,500 vel leh office lama thawkte chu a rang thei ang bera an hlawh pe turin sorkar an phût.

MPC chuan, Mizoram SSA hnuaia sikul 499-a thawk zirtirtu mi 2,500 vel leh SSA office hrang hranga thawkte'n July 2016 aṭanga hlawh an lâk theih loh vanga chhungkaw buai leh mangang taka awmte chu an lainat thu an tarlang a, "Sorkar laipuiin SSA-a thawkte hlawh a tumsak bak Mizoram sorkarin a tum ve tur (state corresponding share) 10% a hrènsak vanga thla li hlawh la thei loa awm tawhte hi chhuanlam dang siam loa a rang thei ang ber a an hlawh pe turin Mizoram sorkar kan ngen a ni," an ti.

MPC party chuan, Congress leh MNF party-te'n sorkarna an chelh chhungin Lunglei khawpui leh a chhehvel khaw hrang hrangah hmasawnna ruhrel chhawrnaawm tak an la siamsak lo nia sawiin, harsatna an tawhte sutkian tum loa an phurrit belhchhah zawnga hma la ṭhinah sorkar an puh a ni.