Road Safety Council chungchang sawiho a ni

Transport department hotute chu nimin khan Transport minister John Rotluangliana hoin a pisaah an ṭhukhawm a, State Road Safety Council chungchang an sawiho.

Meeting-a tarlan danin, Supreme Court chuan India ram puma accident vanga thihna thleng ṭhin chu kum 2020-ah 50%-a tihhniam a nih theih nan state leh union territory zawng zawngte chu State Road Safety Council din turin a phût a ni.

Supreme Court thuchhuak bawhzui hian Transport department chuan ‘Road Safety Council’ a din a, notification pawh tihchhuah thuai a tum a ni. Road Safety Council chuan mi tinte him tlân zawk theih nan lirthei khalh-tute leh mipuite hriat tur leh zawm tur hrang hrang duangin, bawhzui a nih dan an thlithlai dawn a ni.

Meeting-ah hian Transport secretary Dr Franklin Laltinkhuma, additional secretary H Laizika, Transport director R Remmawia leh official hrang hrangte an tel a ni.