Langtlang leh belhtlak nih kan tum-Hawla

Chief minister Lal Than-hawla chuan, a kaihhruai sorkar thil tum ber chu mipui tana dâwr nuam, sorkar langtlang leh sorkar belhtlak nih a nih thu a sawi.

New Secretariat Complex tawntirha Directorate of Econo-mics & Statistics building thar nimina a hawnnaah Chief Minis-ter chuan, "Mipui tana dâwr nuam sorkar, sorkar langtlang leh sorkar belhtlak nih hi kan tum ber a ni a, hemi atan hian kan thawhho a pawimawh. Sorkar hnathawkte hi min mamawhtu leh mi dawrtute'n beiseina nen min pan a, thlamuantu ni turin tu pawh hi biak nuam leh dâwr nuam kan nih ṭheuh a pawimawh," a ti.

Chief Minister chuan, sorkara hnathawk zawng zawngte chu tunlai thiamna ûmpha tura an inpuahchah a ngai tih sawiin, "Hemi kawngah hian ṭan la turin sorkar hnathawkte ka chah duh che u. Mipui leh a mamawh apiangte'n Mizoram chanchin leh sorkar kalphungte an hriat zung zung thei nan department zawng zawngte hian kan website-te hi kan enkawl uluk a ngai," a ti a; department hrang hrangte chu uluk lehzuala website enkawl turin a chah.

Khawvel inher chhoh zelah statistics dik leh felfai behchhanin ruahmanna siam a ni tawh tih sawiin Lal Thanhawla chuan, "Statistics pawimawhna kan hre zel a, plan dik leh ṭha neih kawngah statistics hi hmanraw pawimawh tak a ni. Mizoram hi rambuai vangin kawng engkimah kum 20 chuang hnung kan tawlh a, tunah chuan mi dangte ûmpha turin kum 40 economic lamah kan hnufualna hi kan clear a ngai a, hemi atan hian hmathlir ṭha leh a ngaihna hria nih a ngai," a ti.

Planning minister Lalsawta pawhin thu sawiin, Economics & Statistics department-a thawkte chu an puala building an neih tawh avangin nasa zawka hna an thawh zel a beisei thu a hrilh a, "Economics & Statistics depart-ment hian hmachhawn pawimawh tak kan nei a, chu chu zero base statistics neih tura kan ṭan kan lak hi a ni," a ti. Statistics dik neihna kawnga tun hnaia BPL survey neih dante a sawifiah nghal.

Directorate Economics & Sta-titics building sak leh a design ṭul dang zawng zawng chu NECS-in an khawih a; in sak nan hian cheng nuai 608.12 sên a ni.