Anganwadi worker award sem a ni

Social Welfare department (SWD) chuan nimin khan angan-wadi worker thawk ṭha lawmman, state level Best Angan-wadi Wokers' Award 2015-16 an sem a, mi panga hnenah SWD minister PC Lalthanliana'n a hlan.

Award semna inkhawm hi SWD secretary P Lalchhuanga'n a kaihruai a; minister PC Lalthanliana chuan, Isua'n naupangte a hmangaih a, a duh takte an ni tih sawiin, "Naupangte enkawltute kan ni a, anganwadi worker-te in pawimawh a, Pathian thu aṭang pawhin a pawimawh. Naupangte hi fanau rochante an ni a, a enkawltute in ni a, a bulṭhuta pawimawh berte zinga mi in ni," a ti.

SWD Minister chuan, SWD chu naupang, tar, rualbanlote, natna khirh tak veite leh ruihhlo ngaite enkawltu an ni tih sawiin, "Khawvel ngaihah thil ropui tak a ni lo mai thei a, kan enkawl tam tak hi veng chhungah pawha an duh lohte an ni. Mahse, hna pawimawi tak thawk kan ni," a ti a; SWD-a thawkte leh anganwadi worker-te chu an hnathawhte a pawimawh hle tih hre thar turin a fuih.

PC Lalthanliana chuan, SWD chu directorate pahnihah ṭhen tum a nih thu sawiin, "Cabinet-in Women and Child directorate siam a thuphungin kan pawm tawh a, naktukah Cabinet meeting-ah kan ngaihtuah leh dawn," a ti.

Minister chuan, SWD leh angan-wadi worker-te chu tun aia hma-sawn tum zawka an kal zel a ngai tih a sawi a; award dawngtute a lawmpui thu sawiin, anganwadi-ah hmasawnna thar awmtir tura inpe lehzual turin a chah a ni.

State level Best Anganwadi Wokers' Award dawngtute chu - Lianzuali, Khawzawl Anganwadi Centre-XV; Ngurhmingthangi, Reiek Anganwadi Centre-VI; C Kungpuii, Kawrtethawveng Anganwadi Centre-III, Lily Parmawii, Champhai Zion Veng Anganwadi Centre leh, Lalhruai-tluangi, Phullen Anganwadi Centre-IV te an ni. Award hian Rs. 5,000, thuchei leh thilpek a keng.

SWD tarlan danin, Integrated Child Development Scheme (ICDS) hi kum 1978-ah East Lungdar-ah din ṭan a ni a, tunah hian Mizoramah ICDS project 27 awmin, anganwadi centre 2,244 a awm a, anganwadi worker 2,244 leh helper 2,244 an awm.

Kum 1995 aṭangin anganwadi worker thawk ṭha thlan a ni ṭhin a, state level leh national level award pek ṭhin a ni. State tinin state level-a worker ṭha panga an thlante aṭangin national award dawng tur an thlang leh ṭhin. Mizoramah state level anganwadi worker award dawng tawh mi 85 an awm a, national award dawng tawh mi 15 an awm bawk.