Sorkarin ruihhlo ngaite a ngaihsak - Home Minister

Mizoram sorkar leh Central YMA ṭangkawpin Ṭawngṭai Bethel Camping Centre, Chawnpuia hmei­chhe awmna tur hostel an sak chu nimin khan Home minister R Lalzirliana'n a hawng. Minister chuan, sorkarin ruihhlo ngaite a ngaihtuah niin a sawi.

Home Minister chuan, "Sorkar hian ruihhlo vanga buaite a ngaihsak em em a, beiseina neiin i nung ang u. A ngai rengin kan awm dawn lo tih kan hriat chian a pawimawh," a ti.

Ruihhlo ngaite fuihin R Lalzirliana chuan, "He lai hmunah hian chhung­kua leh khawtlang pawhin an ngaihtheih loh awm khawm in ni. A huhoa awm ringawta ṭhat a tâwk lo," a ti a, home-a awmte chu luh nawn tum tawh lo turin a chah.

Home an chhuahsan huna chhungkua leh khaw­tlang tana mi ṭang­kai nih tum turin home-a awmte chu chahin Lal­zirliana chuan, "Min hmangaihtute hma­ngaih let ve hi kan tih tur a ni tih kan hriat a pawimawh," a ti.

Home Minister chuan, ruihhlo ngaite dahna hmun chuan sawisel a hlawh
ṭhin thu sawiin, "Hetiang sawi­seltute hian rinna leh khawngaihna tel loin an sawisel a nih ka ring," a ti a; home-te chuan hna ropui leh ṭangkai tak an thawh thu a sawi.

DGP Thianghlima Pa­chuau pawhin thu sawiin, "Nakkin lawka chhuak mai turte pawh in ni thei. Mi dangte hnena Pathian thu hrilhtu in la ni thei a ni," tiin, home-a awmte a fuih.

Excise & Narcotics commi­ssioner Lalhmun­sanga chuan, home-a awmte chu sorkarin a ngaih­sak tih a hrilh a, "Heti khawpa a ngaihtuah che u avang hian bat in nei. In luh chhan in hriat a, ṭha taka he hmun aṭanga chhuah hi in bat a ni," a ti.

Inkhawm kaihruaitu CYMA president Lalbiak­zuala chuan, sorkar leh CYMA ṭangkawpin ruihhlo a donaah misual vuak leh ruihhlo man ringawt chu an thil tum a ni lo tih sawiin, "Ruihhlo vanga rahbi tleu tawhte nun siam hi kan tum ber a ni," a ti a; hostel hawn tâk chuan an thil tum a tihlan thu a sawi.

Ṭawngṭai Bethel Camping Centre-a hmei­chhe awmna tur hostel sakna atan hian Home department-in Rs. 5,00,000 an thawh a, a sak hna chu CYMA, Police leh Excise & Narcotics department-te'n an thawk. Thâ 742 sen a ni a, a dung ft. 40 leh a vâng ft. 24-a zaua sak a ni.

CYMA hruaitute
aṭanga thu dawn danin, CYMA hnuaia Supply Reduction Service (SRS)-te'n ruihhlo vanga an mante chu awm man chawi loin Ṭawngṭai Bethel Camping Centre-ah hian dah ṭhin a; a khah vek tawh pawhin YMA-in an ngen chuan an hnar ngai lo.