KHAWTHLIR

Mizoram quota

Higher & Technical Education-a Technical Wing chuan thuchhuah siamin, Mizoram quota-a kum 2017-a engineering leh medical (MMBS/BDS) zir tumte tana hriat tur a tarlang a, HTE Technical Wing pisaah man chawiin online application tihsak theih an nih thu an puang. JEE-2017 online application fill-up turin Aadhaar card neih a ngai a, hriat tur ṭulte chu HE Technical Wing-ah ngaihven theih a ni.

ZDF tel lo

Zoram Decentralisation Front chuan thuchhuah siamin, November 17, 2016-a PRISM office-a kum 2018 MLA inthlan­ah candidate nei tura rélho zingah an tel loh thu an tarlang a, "ZDF tel anga ziah lanah khan candidate nei tura rêlnaah kan tel lo tih kan puang a, an thutlukna hi kan hriatpui lo," an ti. MLA candidate neih leh neih loh turte leh pawl dang thawhpui chung-changte an la sawi ngai loh thu an sawi bawk.

MUP Rûn hawng

Serkhan MUP Rûn chu Thawhṭanni tlai khan bialtu MLA Hmingdailova Khiangte, parliamentary secretary-in a hawng. In sakna sum chu Hmingdailova Khiangte-in a MLA fund aṭanga a pek a ni a, Rs. 1,10,000 sênga sak a ni.

Cultural Meet

Central YMA bultumin November 25, Zirtawpni khian Lammualah Joint Cultural Meet-cum-Bio-Resources Festival 2016 buatsaih a ni dawn a, chief minister Lal Thanhawla khuallian a ni ang a, minister, parliamentary secretary, MLA leh sorkar department hotute tel vek tura beisei an ni. Festival-ah hian YMA, CYLA leh MTP aiawhte'n hnam lâm chi hrang hrang an entir ang.

NLUP sem

Chalfilh bialtu MLA Dr. Ngurdingliana chuan, Thawhṭanni leh nimin khan a bial chhung Phullenah leh Suangpuilawn­ah NLUP a sem. Dr. Ngurdingliana chuan, "NLUP-ah hian cheng vbc. 288 leh NEDP-ahvbc. 250 kan dah a, hei aia tam hi nakkumah kan dah leh dawn. NLUP hlawhtlinpuitute chu NEDP hmangin kan tanpui chhunzawm zel dawn a ni," a ti.