Pi Pángi Péng siam dan tur an sawiho

Republic Veng, Upper Republic leh Venghlui inrina kawngpui péngṭhuam, Pi Pángi Péng zauh leh râwt hniam chungchangah nimin khan IPR Auditorium-ah inrâwn khawmna hun hman a ni.

UDPA minister Zodintluanga chuan, kawng siam mek chu November 30, 2016-ah laih chhiat ṭan a ni dawn a, December 5 thleng kawng dan a ni dawn tih a sawi.

Sorkar thuchhuah tarlan danin, Pi Pángi Pêng zauh hna hi New Economic Development Policy (NEDP) hnuaia hmalakna a ni a, UDPA department hnuaia thawh a ni. Hemi chungchang nimina sawihonaah hian MLA pahnih - Vanlalzawma leh R Vanlalvena te bakah, kawngpuiin a nghawng tur veng hrang hranga khawtlang hruaitute leh sorkar department hotute an tel.

Zodintluanga chuan, Pi Pángi Pêng peng-ṭhuam siam mek chu Aizawl khawpuia traffic jam nasa lutuk tihziaawmna tura hmalakna a nih thu sawiin, "November 30 aṭangin motor kal theih loha danchah a, darkar 24 chhung chhum lo chat loa hna thawkin, December 5-ah tui supply, BSNL hrui siamṭhat leh blacktop nen zawh vek tum a ni," a ti.

UDPA Minister chuan, kawng péngṭhuam siam vanga harsatna tawk mipuite chu hun rei lo te chhungin kawng nuam leh ṭha zawk an nei dawn tih hriaa dawhthei taka nghâk tur leh sorkar hmalakna thlawp turin Minister chuan a sáwm a ni.

Zodintluanga chuan, Dawrpui Venga Aizawl Civil Hospital bul, Millennium Centre junction siam hna te, Bawngkawna Sairang lam panna kawng péngṭhuama traffic point awm ngai loa motor kual theihna tur zau tak siam leh, Hunthar Venga Company Péng siamṭhat hnate pawh thawh tum a nih thu a sawi bawk.

MLA pahnih - Vanlalzawma leh R Vanlalvena te pawhin thu sawiin, khawtlang
ṭhatna tura sorkar hmalakna chu lawmawm an tih thu an sawi.

UDPA secretary Dr C Vanlalramsanga chuan, Bawngkawn, Pi Pángi Pêng, Vaivakawn-Hunthar péngṭhuam leh Millennium Centre junction siamna turin NEDP hnuaiah sorkarin cheng nuai 650 a pawm tawh thu a sawi a ni.

PWD leh PHE aiawhte'n an sawifiah danin, Pi Pangi Pêng siam hna hi October 29, 2016-ah ṭan a ni tawh a, retaining wall siam hna thawh mek a ni. November 30 - December 5 chhung chhum lo chat loa hna thawh tur niin, motor reng reng kaltlang phal a ni dawn lo. A siamna atana sum ruahman zat chu cheng nuai 61.05 a ni.