India-a Dengue vanga natna thlen dan Mizoramah Dengue vanga thi an awm lo

India ramah kum 2015 khan dengue vei mi 99,913 hmuhchhuah niin, mi 220 an thi a, kuminah November 14 thleng khan mi 90,277-in an vei a, Dengue vangin mi 179 an thi. Mizoramah erawh chuan Dengue vei mi eng emaw zat hmuh ni tawh mah se, Dengue vanga thi an la awm lo.

Union minister of state for Health and Family Welfare Sh Faggan Singh Kulaste-in nimina Rajya Sabha session-a zawhna a chhan danin, kum 2015 khan Mizoramah Dengue vei mi 43 hmuh an ni a, kuminah November 14 thleng khan mi 29 hmuh ni tawh mah se, Dengue vei hmuh a nih tirh aṭangin thi an la awm lo.

Hetih lai hian, Mizoram Health department-in November 17, 2016-a thuchhuah a siam danin, kum 2012 aṭanga kumin chhungin Dengue vei mi 268 hmuh chhuah tawh an ni. Kumin chhungin Aizawl bikah veng 30 velah Dengue natna vei mi 193 hmuh tawh an ni bawk.