Bru mi 29,964 endik an ni tawh

Tripura-a Bru relief camp-a Mizoram mi, Mizorama hruai kîr theih turin nimin khan camp lian ber, Naisingpara-ah enfiah hna thawh leh a ni a, Naisingpara bikah zawh a ni. Camp pangaah nimin thleng khan chhungkaw 4,896-a mi 29,964 endik an ni tawh.

Bru enfiah tawhna camp-te chu - Naisingpara, Asapara, Hamsapara, Khakchangpara leh Kaskau camp-te a ni Asapara, Hamsapara, Khakchangpara leh Kaskau-a mite enfiah an nih hnuah ni ruk chhung Naisingpara-a mite enfiah leh an ni. Enfiah tawh zinga mi 21,150 chu puitling an ni a, mi 8,814-te chu naupang, kum 12 hnuai lam an ni.

Naisingpara hi camp lian ber a nih angin, chhungkua 2,700 vel an awm a, nimin khan enfiah zawh a ni a; ni ruk chhungin Naisingpara-ah hian chhungkaw 2,961-a mi 17,681 chu hruai kîr tura chhin-chhiah an ni.

Thawhṭanni bikah chuan chhungkua 479-a mi 2,944 enfiah an ni a, puitling 2,110 leh naupang 834 an ni. Endik zinga chhungkaw 474-a puitling 2,091 leh naupang 820, mi 2,911 chu Mamit district mi an ni a; chhungkaw palia puitling 17 leh naupang 13, mi 30 chu Kolasib district mi niin, chhungkaw pakhata puitling pahnih leh naupang pakhat, mi pathum chu Lunglei district mi an ni.

Enfiahnaah hian Mizoram
aṭanga kal identification team-te bakah, Tripura sorkar aṭangin deputy collector Animesh Debbarma leh police-te an tel a; Mizoram Bru Displaced People Forum president A Sawibúnga, vice president K Lal-dawngliana leh general secretary Bruno Mesha te an tel bawk.

Thu dawn danin, vawiin aṭang-
in Hazacherra relief camp-a mite enfiah an ni leh dawn a; he camp hi Naisingpara aṭanga km. 8 vela hláa awm niin, chhungkaw 400 chuang an awm a, an zinga tam ber chu Lunglei district mi an ni.