Corruption-a fihlîm loah sorkar puh

MNF vice president Dr R Lalthangliana chuan, Congress sorkar corruption-ah a fihlîm anga sawi a awm nia sawiin, "Thu belhchian dâwl lo a ni," a ti.

Thawhṭannia Tuivawl South Block MNF Conference, Darlawna a hmanpuinaah Dr R Lalthangliana chuan, "Chief Minister leh Congress hruaitu ṭhenkhatin Congress sorkar corruption-a fihlim anga an sawi fo hi thu belhchian dâwl lo a ni. Congress sorkarah vai contractor liante'n thil an ti thei em em a, sorkar hian a hlau em em a ni. Heng vai ho nen hian puanhnuai thil an ti nasa tih a chiang a, kawng chhiat chhante pawh hi corruption vang liau liau a ni," a ti.

MNF Vice President chuan, SSA zirtirtute'n thla li chhung hlawh an la tawh lo leh Hindi zirtirtute'n thla riat chhung hlawh an la tawh lo chu mak a tih thu leh pawi a tih thu a sawi.