Sorkar damdawi-in ni lote'n Health Care Scheme hman loh chhan puang
Non Government Hospital Association of Mizoram (NGHAM) chuan thuchhuah siamin, chhan hrang hrang avangin Mizoram Health Care Scheme (MHCS) hman theih a nih hrih loh thu an tarlang.
Mizoram sorkarin October 1, 2019-a Health Care Scheme a tlangzarh chu nghakhlel taka an lo thlir thu tarlangin NGHAM chuan, "Damloten an hman ṭangkai theih kan duhsak em em a ni. He scheme chungchangah hian sorkar damdawi-in ni ve lote tan zawm ve harsatna a awm avangin sorkar thuneitute biain ngenna kan thlen fo a ni," an ti.
NGHAM chuan sorkar aṭanga chhanna an nghah mek laiin sorkarin notification leh order-ah ‘Sorkarin rate a siam ang chauhin recognised hospital ten an enkawl tur a ni a, hetianga enkawl duh lo chu an empanelment suspend sak tur a ni' tih thu an dawn thu an tarlang.
NGHAM member hospital-te chuan sorkar programme tihhlawhtlin leh damlote harsatna sutkian pui an chak thu tarlangin NGHAM chuan, "Kan dinhmun harsa tak hi sorkarin min hriatthiampui kan beisei tak meuh meuh a ni. Tunah hian damlo ten an bill zawng zawng 100% an tum avangin mite an mangang tak meuh a, hospital-te manganna aiin mipui manganna a tam zawk mah a, kan dilna hi a hlawhtling a nih chuan mipui harsatna tam tak hi a kiang ngei ang," an ti.
NGHAM hospital-te :
n Synod Hospital, Durtlang, Aizawl
n Ebenezer Medical Center, Aizawl
n Aizawl Hospital & Research Centre, Aizawl
n Serkawn Christian Hospital, Lunglei
n Greenwood Hospital, Aizawl
n Grace Nursing Home, Aizawl
n Adventist Hospital, Aizawl
n Care Hospital, Aizawl
n Bethesda Hospital & Research Center, Aizawl
n John Williams Hospital, Lunglei
n LRM Hospital, Aizawl
n Alpha Hospital, Aizawl
n Med Aim Hospital, Champhai
n Nazareth Hospitals, Aizawl & Kolasib
n Mercy Hospital, Serchhip
n Maraland Gospel Centenary Hospital
n Hope Hospital, Lunglei
n BN Hospital & Research Center, Aizawl
n City Hospital, Aizawl
n Redeem Hospital, Aizawl
n Faith Hospital, Lunglei