Good Governance Day kan hmang lo ang - BJP

BJP, Mizoram Pradesh chuan thuchhuah siamin, sorkar laipuiin prime minister Atal Bihari Vajpayee chawimawi nana a pian champha, December 25 chu Good Governance Day atana kum 2014-ah puang mah se, Mizoramah chuan hman a ni ve ngai dawn lo niin an tarlang.

Mizoram BJP chuan, Good Governance Day chu kum 2014-ah puan ni mah se, Mizoram chu Kristian ram a nih vang leh Kristiante hunpui ni tak a nih avangin kum hnih chhungin Mizoramah hman a la ni ve ngai lo tih an sawi a, "Hun lo kal zel turah pawh December 25-ah Good Governance Day kan hmang ve ngai dawn lo tih Zoram mipuite min hriatsak turin kan puang a ni," an ti.

Mizoram BJP chuan, kum 2014 aṭanga Good Governance Day atan December 25 ruat a nih chungchang leh hemi nía Good Governance Day hman a nih dawn leh dawn loh thu-ah Mizorama Chief Minister chu tun thlengin a ngawi tlat nia sawiin, "Ṭawngkam engmah a nei duh loh hi mak kan tiin demawm kan ti hle," tiin an tarlang.

BJP chuan, Goa CM Laxmikant Parsekar chuan “December 25 hi Krismas a ni a, kan unau Kristiante zahna vangin hemi ní hian Good Governance Day kan hmang dawn lo,” tiin a lo sawio tawh niin an tarlang a; CM Lal Thanhawla chu December 25-ah Mizoramah Good Governance Day hman a nih ve dawn loh thu Zoram mipuite hriata puang chhuak ngei turin an phût a ni.