KHAWTHLIR

Zoram Drivers’ Union (ZDU) huaihawtin nimin aṭang khan Mizoram pumah Road Safety Week (Fimkhurna Hapta) hman ṭan a ni a, thupui chu ‘Fimkhur la, nun chhanhim rawh’ tih a ni. He week hi district hrang hrangah hawn a ni a, Lungleiah chuan zing karah Lunglei Police Station hawnna inkhawm neih niin, Lunglei HPC vice chairman Lawm-awma Tochhawng, MLA-in a hawng. MLA bakah, Lunglei additional DC David Liansanglura leh SDPO F Vanlalrochana ten thu an sawi a ni.

Mission Veng Kohhran biak-inah Synod Inkhawmpui ṭan a nih dawn avangin Traffic SP Rodingliana Chawngthu chuan lirthei tlan danah hriattirna a tichhuak. Traffic SP tarlan danin, December 7, Inrinni-ah Mission Veng Bazar kawngpui dungah thlai leh thil dangte zawrh phal a ni dawn lo a, hemi ní bikah hian Sikulpuikawn leh JL Cinema Hall hlui inkarah inzawrh theih a ni ang. Bazar sawn a nih dawn avang hian Upper Khatla kawngpuiah Sikulpuikawn lam pan chauhin lirthei tlan theih a ni dawn a, Sikulpuikawn lam aṭangin tlan luh phal a ni lo ang.

Lunglei HPC vice chairman Lawmawma Tochhawng, MLA chuan an hmalakna  'Poultry Farming for Eggs' kal zelah tun hnai khan Zobawk South Poultry Farming Society-te inbuatsaih dan a hmunah kalin a enfiah. Zobawk South Poultry Farming Society-ah hian ar vulh tura thlan chhungkua 20 an awm a, ar 100 zel vulh tura in sak leh an tlatna turte ruahmanna anga siam a ni em tih enfiah a ni.

Serkawn Branch YMA chuan tun hnai khan an veng indoor stadium-ah Career Guidance cum Felicitation Programme an buatsaih a, Mizoram Youth Commission chairman Dr Vanlalṭanpuia'n a hmanpui. MYC Chairman chuan, UPSC-a inziak tling Mizo an tlem lutuk chu pawi a tih thu sawiin, "Zirna lamah ṭan kan lâk thar hle a ngai a ni," a ti.