Public relation huangah ṭan a ngai - IPR Minister

Information, Public Relations, Printing & Stationery (IPRPS) minister thar B Lalchhanzova chuan nimin khan a pisaah, IPRPS department-a administrative officer-te leh directorate-a officer-te a kâwm a; sorkar department tinin public relation huangah ṭan an lak thar a ngaih thu a sawi.

B Lalchhanzova chuan, sorkar notification, scheme, policy leh sorkar hmalakna puanzar leh zirtirna kawngah IPR department hman ṭangkai lehzual a ngaih thu a sawi a, "Department tinte'n IPR department kaltlangin public relation huangah ṭan an lak thar a ngai. Department-te'n Printing & Stationery an hman ṭangkai dante pawh ennawn a ṭul," a ti.

Department official-te chu department dangte ṭha taka thawhpui thiam tura chahin IPRPR Minister chuan, "Ka department hnuaia hmalakna kaihhnawihah minister-in a hriat tur âwm chi reng rengte chu thutlukna ṭha zawk siam a nih theih nan rawn thlen vat ṭhin ang che u," a ti. Sorkarin mipui tana hna a thawh, thutlukna a siam leh mipui tana hamṭhatna a siamte mipuiin an chhawr theih nan, mipuiin chiang taka an hriat a ngaih thu a sawi bawk.