Aizawlah Lehkhabu Pho Rûnpui ṭan
Mizo Writers Association (MWA)-in nimin khan Vanapa Hall-ah Lehkhabu Pho Rûnpui vawi 5-na an buatsaih ṭan a, minister K Sapdanga'n hawngin, lehkhabu chhuak thar 15 a tlangzarh.
MWA Lehkhabu Pho Rûnpuiah hian mi 100 vel kutchhuak lehkhabu 487 pho chhuah a ni a, October 16, 2025 thleng awh tur a ni. Chawhma dar 10 aṭanga tlai dar 5 thleng hawn ṭhin a ni dawn a, a tawp níah zan dar 9 thleng hawn a ni ang.
K Sapdanga chuan, ziakmite'n thu ṭha leh ril, dik leh tlo tur ziah kawnga theihtawp chhuah zel tura a duh thu a sawi a, "Lehkhabu hi mi thiamte thiamna kan chhim theihna, finnaa min châwmtu, thiam zirna hmanrua leh khawvel tukverha kan dah chhuah theihna hmanraw pawimawh, mihringte finna chher chhuaktu leh vawnghimtu pawimawh a ni," a ti a; mipuiin lehkhabu chhiar lama ṭan an lak zual a ṭul thu a sawi.
MWA member-te chu lehlin hna thawktu pawimawh an nih thu leh ziakmite chu hnam tana mi hlu tak an nih thu sawiin K Sapdanga chuan, Mizo ziakmite chu lehkhabu lehlin kawngah theihtawp chhuah zel turin a chah a; ziakmite hlutna hre thar turin Mizo mipui a chah bawk.
Lehkhabu Pho Runpui hawnna inkhawm hi Organising Committee chairman C Lalrinpuia'n a kaihruai a, chief information commissioner John Neihlaia'n RTI Act chungchang a sawi. MAL Book of the Year 2024 dawngtu F Vanlalrochana leh Lehkhabu Lehlin Ṭha Ber 2024 dawngtu Lalrinzuala Pachuau te kawmna hun hman a ni.
MINISTER-IN LEHKHABU A TLANGZARHTE
1. Mizo lalte thubuai rem dan a lai tawk em? (A Critical Study of Mizo Customary Law)
Ziaktu: K. Remruatfela
2 Zahna zahzehin
Ziaktu: Lalthantluanga Chawngthu
3. Lala dawhthlak
Ziaktu: C. Laizawna
4. Diary of Pastor Chhawna
Ziaktu: C. Laizawn
5. Hmanlai an chang ta maw
Ziaktu: R. Rothangpuii
6. Thawnthu tawi pasarih
Ziaktu: Mai Shokhlei Par
7. Shhorvir Khuangchera
Ziaktu: Prof. Laltluangliana Khiangte
8. A Study of Mizo Novel
Ziaktu: Prof. Laltluangliana Khiangte
9. Thinlung thangkhawk
Ziaktu: Mahmuaka Chhakchhuak
10. Zalenna sualtu au aw
Ziaktute: Thang Sian Tluang & HL Lawmzuala
11. Dr. BR Ambedkar-a chanchin
Ziaktu: Lalṭanpuia Hnamte
12. Mitthi tho leh
Ziaktu: Hausanga Hauzel
13. Vau vullai
Ziaktu: Ngotekherh
14. Mizo ṭawng chhuina
Ziaktu: C. Chhuanvawra
15. Mizo chanchin chhui zauna
Ziaktu: B. Lalthangliana