KHAWTHLIR

Presbytery khawmpui

Mizoram Presbyterian Kohhrana inkhawmpui lian ber dawttu, presbytery inkhawmpui chu nimin khan presbytery hrang hrangah ṭan a ni. Nimin chhun khan presbytery hrang hrangah kohhran upa atana thlan tharte exam neihpui an ni a, upate chu Pathianni chawhma inkhawmah nemngheh an ni ang. Mizoram Synod hnuaiah presbytery 47 a awm mek a, presbytery inkhawmpuiahte hian vawiin leh naktukah rorel a ni ang.

Kawng enfiah

PWD minister Vanlalhlana chuan October 21-23, 2025 chhunga Sakawrdaia YMA Inkhawmpui Lian neih tur benchhenin nimin khan New Vervek, Mauchar, Tuirial, Saipûm, Saiphai, Vairengte leh Serkhan inkar kawng National Highway-306A a enfiah. NH-306A hi Kolasib leh Mamit district tana Sakawrdai pan theihna tur kawng niin, kutcha road (metal loh) a ni a; Minister chuan, he kawngah hian nuam zawk leh him zawka lirthei a tlân theih nan chak taka hmalak a nih thu a sawi.

PES Quiz ṭan

Synod Information & Publicity Department (Synfo) chuan Mizoram puma Presbyterian English School (PES)-te pualin quiz an buatsaih ṭan. Quiz hi October 7, 2025 khan Aizawl leh khaw dang pasarihah screening neih niin, sikul 73 an tel. Screening test hi sikul 25-in paltlangin, chu'ngte chu November 27, 2025 zanah an intihsiak ang a, a ti ṭha sikul pangate November 28, 2025 zanah an intihsiak leh ang. PES Quiz-ah hian pakhatnain Rs 1,00,000, pahnihnain Rs 70,000 leh pathumnain Rs 50,000 an dawng dawn a ni.

Chite lui sawiho

Save Chite Lui Executive Committee chuan an chairman Khilli Ram Meena, chief secretary hoin CS Conference Room-ah Chite Lui Riverfront Development Project chungchanga hmalakna kal mek an thlirho. PWD-in concept paper leh ṭul dang an siam chu sawiho a ni a; ruahmanna awm sa tidanglam deuhin, project chu huang (component) pathumah an ṭhen a, a ruala kalpui tura ruahman a ni.

Minister-in hawng

Rural Development & Administration minister Prof Lalnilawma chuan nimin khan Hnahthial District Panchayat Resource Centre (DPRC) building, Electric Veng, Rallangtlanga sak a hawng a, bialtu MLA Jeje Lalpekhlua'n a ṭawiawm. DPRC building hi office bulding leh hostel building tia ṭhen a ni a, cheng nuai 100 ve ve senga sak a ni.