Kutdawhte chhan chhuahna tura duan SMILE Beggary Project hawn a ni

Kutdawh lo thei loa awmte chhan chhuahna tura duan, SMILE Beggary Project chu nimin khan Social Welfare minister Lalrinpuii'n ATI Auditorium-ah Aizawl district-a kalpui turin a hawng. Minister chuan, India ram hmun danga kutdawha eizawng leh mi dang kutdawh luihtir ang chi Mizoramah a awm loh nan theihtawp chhuah an tum thu a sawi.

Support for Marginalised Individuals for Livelihood and Enterprise (SMILE) project hi Ministry of Social Justice and Empowerment hnuaia sub-scheme pakhat a ni a, kum 2022 aṭanga kalpui a ni. Mizoramah chuan Aizawl district-ah kalpui tura ruahman a ni a, bawrhsap kaihhruaina hnuaiah Mission Foun-dation Movement (MFM)-in an kalpui ang.

Lalrinpuii chuan, SMILE project chu kutdawh lo thei loa awmte chhan chhuahna tur a nih thu a sawi a, "Mizoram hi kutdawh awm lohna ram kan nih theihna turin sorkarin ṭan a la mek. Mizote hi kutdawh hnam kan ni ngai lo a, kutdawha eizawng emaw, mi dang kut dawh luihtir ang chi, India ram hmun danga kan hriat angte hian min rawn chiahpiah lohna turin theihtawp chhuah kan tum a, mipui pawhin min thlâwp tlat kan beisei," a ti.

SMILE Beggary Project hian counseling, hriselna lama enkawl leh zirna lam bakah thiam thil zirtir (skill development)-te a huam dawn thu sawiin Minister chuan, "Kutdawhte awmna tur bik siamin, chu'ngah chuan enkawlna leh chhawmdawlna hrang hrang kalpui a ni dawn a, retheihna ûm bona ṭha tak a nih ka beisei. Kutdawhte zawn chhuah leh chhawmdawl kawngah local council leh YMA puihna kan mamawh dawn," a ti a; scheme-in a tum hlen a nih theih nan uluk taka kalpui turin project enkawltu MFM a chah.

Lalrinpuii chuan, kutdawhte chhawmdawl kawngah Mizoram sorkarin sum sen a inhuam thu a sawi a; SMILE Beggary Project chu tun hnaia Mizoram sorkarin a pass tâk kutdawh khapna dan nen rem taka kalpui a nih theih nan hmalak a nih tur thu leh, Aizawl district-ah bul ṭanin, Lunglei lam pawh huam tel tum a nih thu a sawi bawk.

Aizawl bawrhsap Lalhriatpuia chuan, Aizawl khawpui a ṭhang chak hle tih sawiin, "Tun dinhmunah mi 5,00,000 chuang kan khawsa mek. Mipui kan pun rualin kutdawhte pawh an pung ve zel niin a lang a, chutiang mite chhawmdawla enkawl tur chuan SMILE a lo chhuak hi a lawmawm," a ti a; MFM chu Aizawl district-a SMILE project kalpui tura thlan a nih thu a sawi.

MFM executive director Lalramchuanzela sawi danin, SMILE Beggary Project hian sorkar laipui leh state sorkar hnuaia scheme hrang hrangte kutdawhte'n an dawn theih nana hmalak te, zirna leh hriselna bakah, eizawnna kawng zawh thei tura thiam thil zirte a huam a ni.

SMILE Beggary Project hawnnaah hian implementing authority Aizawl DC leh implementing agency MFM ten thawhhona thuthlung an ziak nghal a ni.