Sialsir tina lo turin mipui ngen

Centre for Environment & Social Justice (CESJ) chuan thuchhuah siamin, sialsir (Amur Falcon) ten Khuangchawi Thla (October) laihawlah Mizoram an lo thleng ṭhin tih an tarlang a, Mizoram an lo thlen hunah lo tina lo turin mipui an ngen.

CESJ chuan, sialsirte chu Mizoramah October thla laihawlah an rawn lut a, Pawltlak Thla (December)-ah Mizoram an chhuahsan ṭhin tih tarlangin, "Heng kan mikhual, lam hla tak la kal turte hi lo duat leh an chawlh hahdamna tur lo humhim leh chawlhna tlaka kan ram lo enkawl hi a Mizo a, a Kristian a ni," an ti.

CESJ tarlan danin, sialsir savate chu sa hel ei chi an ni a, Mongolia, China leh Russia ramah no an nei a, khaw vâwt tlansan turin thlasik hmain South Africa-ah an pêm ṭhin. Chumi hnuah India ram lam an pan leh a, India hmarchhak velah fuan khawmin, October-December velah Mizoramah an lut ve ṭhin a ni.

Mizoramah sava chi hrang 679 vel awm anga ngaih a nih thu tarlangin CESJ chuan, "Thlasik laia lo pêm ṭhin te, nipui laia lo chêng ṭhin mai bakah, an pêmna kalkawnga min rawn paltlang ṭhin eng emaw zat an awm a, a tam zawkte hi kan rama chêng nghet an ni," an ti.