Mipui tana ṭangkai zawk theih dan tur ngaihtuah turin Minister-in AMC a chah

Urban Development & Poverty Alleviation (UDPA) minister K Sapdanga chuan October 8, Nilaini khan Aizawl Municipal Corporation pisa a tlawh a; AMC-in tuna a thlen chin aia mipui tana an ṭangkai zawk theih dan ngaihtuah turin AMC hotute a chah.

K Sapdanga chuan, AMC chu UDPA department hnuaia mipui tan rawngbawlna hmun pawimawh leh lian ber a nih thu a sawi a, "AMC hi tuna a thlen chin aia mipuite tana a ṭangkai zawk theih dan ngaihtuah turin ka duh che u," a ti a; municipality hmang ṭangkai thiam ber pawl nih tuma ṭan la tur leh langtlang taka hna thawk turin a chah a ni.

Sorkar, UDPA leh AMC inkarah thawhhona ṭha tak a awm thu sawiin UDPA Minister chuan, "Party sawi loa state sorkar leh AMC thawhhona te, AMC-a thawkte leh UDPA Secretariat leh Directorate-a thawktute inpawh tlannate a fakawm a, hna thawhho theihna tur comprehensive agreement ṭha tak kan siam hi a ṭha hle a ni," a ti.

Aizawl mayor Lalrinenga Sailo pawhin thu sawiin, state sorkar nen thawhhona ṭha tak an neih thu a sawi a, "AMC ngaihsak em emtu UDPA Minister kan nei hi a lawmawm tak zet," a ti a; AMC mamawhte ngaihtuahsak zel turin UDPA Minister a ngen.