MSU-in General Conference an hmang

Mizo Students Union (MSU) chuan Lalnu Ropuiliani Rûn, Hnahthialah General Conference an hmang mek a, October 8, Nilaini zan khan minister PC Vanlalruata leh South Tuipui bialtu MLA Jeje Lalpekhlua ten an hmanpui.

PC Vanlalruata chuan, ram hmasawn nan zirlaite thawhpuiah a sáwm a; tunlai hmasawnna hrang hrang, a bikin rêl kawng rawn lut chu a ṭha zawnga chhawr ṭangkaitu nih tum tura zirlaite chahin, "Periodic Labour Force Survey, August, 2025 report tarlan danin, India ram pumah hna hmu lo (unemployed) chu 5.1% an ni. NITI Aayog, September 2025 report danin Mizoramah hna hmu lo 2.2% an awm mek," a ti.

Zirlaite chu hmasawnna hrang hrang milin tun aṭangin an eizawnna turah ngaituahna an sên a ṭul thu sawiin PC Vanlalruata chuan, "Mizorama thar chhuah, ram danga thawn chhuah tlak thil ṭha tak tak siam thei turin tuna zirlai lehkha thiam tak takte'n rilru in sen a, cooperative movement lama hma la in lak ṭan a pawimawh," a ti a; zirlaite'n Mizo ṭhalai tam tak nun tichhetu, ruihhlo an do tlat a ṭul thu a sawi.

Bialtu MLA Jeje Lalpekhlua pawhin thu sawiin, "Excise department record danin kum 1984 aṭanga tun kum thleng hian ruihhlo vangin mi 1,895 an thi tawh. Ruihhloin inchhungkhur a tihbuaite an awm tawh loh nan zirlaite'n theihtawp in chhuah a ṭul," a ti a; zirlaite chu eng kawng pawh zawh se, harsatna leh beidawn theihna an la hmachhawn vek dawn tih sawiin, beidawng ngai lo turin a chah.

MSU General Conference-ah hian palai riak lut mi 600 vel an awm a; nimin khan ro an rêl a, zaninah a ṭiak ang.