Vohbik naupangte intihhlimna buatsaih

State Council of Educational Research and Training (SCERT) hnuaia Special Education Cell chuan nimin khan SCERT pisa tualah vohbik (persons with disabilities) naupangte tan ‘Colours of Inclusion 2025 - Fest for Special School Children’ an buatsaih a; SCERT director Caroline Zoramthangi'n a hawng.

Colours of Inclusion 2025 - Fest for Special School Children-ah hian sikul paruk - Durtlang Primary School-II, Special Blind School, Redeem Garden, Ephatha Special School, Gilead Special School leh Shining Star School aṭangin naupang 119 an tel. Naupang intihhlimna chi hrang hrang bakah, vohbik sikul naupangte thil siamte pho chhuahna stall eng emaw zat siam a ni.

Caroline Zoramthangi chuan, Festival chu vohbik naupangte’n khawtlanga inthlahrung loa nuam ti taka an tel vei theih nan te, mahni inrintâwkna siamsakna atan te, mi dangte nena chenho thiam leh ṭhian kawm thiam zirtir nan te, taksa, rilru leh hriatna lama hma an sawn theihna atante buatsaih a nih thu a sawi a, "Vohbikte hi thil ti thei lo, infiam thei lo, ṭhian kâwm thei lo anga ngaih an ni ṭhin hi ṭhiah a hun tawh," a ti.