Traffic warden-te certificate hlan

Aizawl City Traffic Police-in traffic warden atana an zirtir chhuah mi 23-te chu nimin khan Traffic SP Ruatsanga Ralte-in certificate a hlan.

Certificate inhlanna hi Traffic roll call ground-ah neih a ni a, Traffic additional SP Sarah Lalrinkimi'n a kaihruai. Traffic SP Ruatsanga Ralte chuan, traffic warden atana training chhuakte chu an duty hlen chhuah kawngah theihtawp chhuah turin a fuih a, "Kan hnathawhnaah uniform ha tur kan nih angin felfai taka inchei a ṭul a, kan tih theih chin, tih tur chin kan hriat chian a pawimawh," a ti a; zûk leh hmuam leh ruih theih thilah fihlim turin a chah.

Sarah Lalrinkimi chuan, kum 2017 aṭangin Mizoramah Traffic Warden Scheme kalpui a nih thu a sawi a; traffic warden atana training chhuakte chu dan kenkawhna kawnga Police-te puitu ṭangkai tak ni turin a fuih.

Traffic warden tharte hi September 23, 2025-ah an training ṭan a, a tirah mi 27 ni mah se, mi 23-in training an zo. Training-ah hian traffic signal-te leh traffic enkawl dante zirtir an ni.