Chief Secretary-in Central Jail a enfiah

Chief secretary Khilli Ram Meena chuan nimin khan Central Jail leh Central Women’s Jail a tlawh a, thawktute leh tángte nen an inkâwm. SASCI Part-I hnuaiah cheng vbc 13.925 sêngin Central Jail sakṭhat tura ruahman mek a nih thu tarlan a ni.

Chief Secretary hian Integrated Counseling and Test Centre, library, computer centre, legal aid centre leh convict ward-te a fang a; Prisoners Welfare Committee hruaitute kâwmin, ni tina hun an hman dan te, hriselna leh ei leh in chungchang te, harsatna an neih leh neih lohte a zawt. ICTC viltu Dr CT Lalruatkima leh staff-te pawh kâwmin, tángte hriselna dinhmun leh an enkawl dante a zawt a ni.

Central Jail hi September 15, 1986 khan hawn a ni a, a hlui tawh avangin SASCI Part-I aṭangin cheng vbc 13.925 sênga sak ṭhat tuma hmalak mek a ni. Chief Secretary chuan, working season chhungin a tam thei ang ber hna thawh hman a nih theih nana felfai taka inpuahchah turin sorkar hotute a chah.

Khilli Ram Meena hian hmeichhe hlang tànna, Central Women’s Jail pawh a tlawh a, ward hrang hrang a fang. CS hi DGP Sharad Agrawal, Home secretary Vanlalmawia Renthlei, Law & Judicial secretary TL Guite, Aizawl bawrhsap Lalhriatpuia, IG (Prison) R Vanlalsawta bakah, Home leh PWD hotu dangte'n an ṭawiawm a ni.