Sorkar hnathawk tur laknaah MPSC chauhin zawhna siam dawn

Mizoram sorkar chuan sorkar hna lak (direct recruitment)-ah department-te'n zawhna an siam (question set) theih chinte chu Mizoram Public Service Commission (MPSC) kutah a dah.

Sorkar hnathawk pay level-05 leh a hnuai lam chu department-te'n question siam leh recruitment an khawih ṭhin a, MPSC-in pay level-06 leh a chung lam a khawih ṭhin thung. Mizoram sorkar chuan ‘The Mizoram Public Service Commission (Limitation of Functions) (Amendment) Regulations, 2025' chu September 24, 2025 khan gazette-ah a tichhuak a; sorkar department hnuaia direct recruitment-a hna lak turah department-in a khawih chin pawh ni se, question siam chu MPSC chauhin an khawih tawh dawn a ni.

Department-te'n question an siam thei tawh lo a, question siam tura mi dang rawih a remchan tawh loh bakah, hna exam kaihhnawih dang - chhanna (answer script) endik leh ṭul dangah pawh MPSC ráwn hmasa chungin department-te'n MPSC puihna an dil thei bawk.